HAMAS alǵash shabýyl jasaǵan alańnan kem degende 260 máıit tabyldy
Myńdaǵan jastar qatysqan Supernova elektrondy mýzyka festıvali Gaza sektorynyń shekarasyna jaqyn shólde ótti jáne ol evreılerdiń Sýkkot merekesine oraı uıymdastyrylǵan. Onda senbi kúni HAMAS sodyrlarynyń alǵashqy shabýyly jasaldy. Eriktiler festıval alańynan kem degende 260 máıit tapty, dep habarlaıdy Kazinform bul týraly VVS jańalyqtaryna silteme jasap.
Eki kúndik Supernova mýzyka festıvali Izraıldiń ońtústigindegi shól dalada evreılerdiń Sýkkot dinı merekesinen keıin 6-7 qazan kúnderi ótti.
Senbi kúni tańerteń HAMAS sodyrlary festıval ótip jatqan alańǵa basyp kirip, kópshilikke oq jaýdyrdy.
Qazir adamdar iz-túzsiz joǵalǵan týystary men dostaryn áleýmettik jeliden izdep jatyr.
Zaka qutqarý uıymynyń málimetinshe, festıval alańynan 260-tan astam adamnyń máıiti tabyldy, iz-túzsiz joǵalǵandar áli naqty eseptelgen joq.
Sharaǵa barlyǵy úsh myńǵa jýyq adam qatysqan.
Úsh sahna men kempıng alańy bar festıval Negev shólindegi Reımge jaqyn jerde ornalasqan.
Al tań atqanda HAMAS sodyrlary paıda bolǵan Gaza sektory úsh shaqyrymdyq jerde.
