HAMAS 10 ızraıldik tutqyndy bosatýǵa kelisti

ASTANA. KAZINFORM – Palestınalyq HAMAS qozǵalysy Dohada ótken konsýltatsııalar barysynda Gaza sektoryndaǵy 10 ızraıldik tutqyndy bosatýǵa keliskenin habarlady. Bul týraly qozǵalystyń Telegram-arnasynda jarııalanǵan resmı málimdemede aıtyldy, dep jazady TASS.

– HAMAS kelissózderdiń sátti aıaqtalýyna múddeli jáne osy maqsatta 10 tutqyndy bosatýǵa kelisim berdi. Alaıda birqatar negizgi máseleler boıynsha keńesý jalǵasyp jatyr. Atap aıtqanda, bul – Gazaǵa gýmanıtarlyq kómekti kirgizý, Izraıl áskeri anklavtan tolyq shyǵýy jáne atysty birjola toqtatý boıynsha naqty kepildikter berý, – delingen málimdemede.

HAMAS Izraıldi kelissózder kezinde qajetti ıkemdilik tanytpaı otyr dep aıyptady. Sonymen qatar qozǵalys ókilderi barlyq kedergini joıý úshin deldaldarmen jumys isteýdi jalǵastyryp jatqanyn atap ótti.

Sársenbi kúni AQSh prezıdenti Donald Tramp óziniń málimdemesinde: «Gaza máselesi boıynsha osy apta nemese kelesi aptada kelisimge kelýge óte jaqsy múmkindik bar» dep baǵalaǵan bolatyn.

6 shildede HAMAS pen Izraıl Mysyr, Katar jáne AQSh-tyń deldaldyǵymen Dohada kelissózder protsesin qaıta bastady. Onyń maqsaty – Gaza sektorynda atysty toqtatý jáne tutqyndardy bosatý týraly kelisimge qol jetkizý. Izraıl jaǵynyń sońǵy derekterine sáıkes, radıkaldar anklavta 20 tiri tutqyndy jáne qaza tapqan 30 adamnyń máıitin ustap otyr.

Aıta keteıik, buǵan deıin Izraıl men HAMAS Gazadaǵy atysty toqtatý boıynsha kelisimge kele bastaǵanyn jazdyq.

Dúnıejúzilik densaýlyq saqtaý uıymynyń (DDSU) bas dırektory Tedros Adhanom Gebreıesýs Gaza sektoryna 11 júk kóligimen medıtsınalyq materıaldar jetkizilgenin aıtty.