«Halyqtyń júreginen shyqqan, zaman synyna tótep bergen Ata zań» - respýblıkalyq basylymdarǵa sholý
***
Keshe Astanada Qazaqstan Respýblıkasynyń Konstıtýtsııasy kúnine arnalǵan «Konstıtýtsııa - qoǵam men memleketti áleýmettik jańǵyrtýdyń negizi» atty halyqaralyq ǵylymı-praktıkalyq konferentsııa ótti. Alqaly jıyn jumysyna Respýblıka Prezıdenti Nursultan Nazarbaev qatysyp sóz sóıledi. Osy jaıt arqaý bolǵan maqala «Egemen Qazaqstan» gazetinde «Halyqtyń júreginen shyqqan, zaman synyna tótep bergen Ata zań» degen taqyryppen berilgen. «Biz yqylym zamandardan ata zańyna baǵyna bilgen, ata zańyn qurmetteı bilgen eldiń urpaǵymyz. Ata-babalarymyz dala zańdarynyń bilgirleri - bılerimizdiń bıligine sózsiz baǵynǵan. Tarıhtan taǵylym alǵan búgingi býyn da ıgi dástúrdi jalǵap, urpaq sabaqtastyǵyn úzgen emes. Táýelsizdigimizdiń tiregi, memleketimizdiń júregi bolǵan Ata Zańymyz máńgilik bolsyn! Elimiz shyrqaý shyńdarǵa, asqar asýlarǵa alqynbaı jete bersin! Konstıtýtsııa kúni qutty bolsyn», - deıdi Memleket basshysy.
***
El táýelsizdigin alǵan kúnnen bastap Qazaqstan Respýblıkasynda memlekettik jáne qoǵamdyq ómirdiń barlyq salasyn qamtyǵan reformalar júrgizilip, bolashaqtyń irgesin bekemdeıtin qadamdar odan ári jalǵasyn tabýda. Ulyq murattaǵy memlekettigimizdi, qoldanystaǵy quqyqtyq qundylyqtarymyzdy nyǵaıtý, qoǵam men onyń músheleriniń tolyqqandy damýyn qamtamasyz etetin ashyq ta tıimdi tetikterdi jetildirý, turǵyndardyń ómir súrý deńgeıin kóterý aıryqsha nazarda ustalýda. Sot júıesindegi san tarap ózgerister de kóz aldymyzda. Ol konstıtýtsııalyq mindettemeler deńgeıinen shyǵyp otyr ma? Qalyptasqan quqyqtyq negizdiń qarym-qýaty ómir mánin nárlendiretin qaınarlardan arna tarta aldy ma? Mine osy saýaldarǵa «Egemen Qazaqstan» gazetiniń búgingi nómirinde Aqmola oblystyq sotynyń tóraǵasy Aqjan Eshtaı tolymdy jaýap bergen. Suhbat «Jaýapkershilik júkteıtin jumys» degen taqyryppen jarııalandy.
***
«Izvestııa-Kazahstan» gazetinde jaryq kórgen «Kazahstanskıe fılmy pýteshestvýıýt po mırý» degen taqyryptaǵy maqalada Armenııada ótip jatqan Qazaq kınosy kúnderi jaıynda jazylǵan. Atalǵan elge aparylǵan fılmderdiń basym bóligi qazaq jáne Qazaqstan tarıhyna arnalǵanyna qaramastan kórermen tarabynan zor qyzyǵýshylyq týdyryp otyr. Qazaq kınosy aptalyǵy aıasynda 5 týyndy armıan kórermenderi nazaryna usynylýda. Atap aıtqanda, kıno aptalyǵy «Kóshpeliler» týyndysymen shymyldyǵyn túrgen. Sonymen qatar bizdiń elimizdi mol aýdıtorııa jınap, eń úzdik fılmderdiń biri sanalǵan «Jaýjúrek myń bala» týyndysy da armıan kórermenderiniń nazaryna usynylatyn bolady.
