Halyqtyń jaǵdaıy nashar dep aıta almaımyn – Tamara Dúısenova tájik jármeńkesi týraly

ASTANA. QazAqparat – QR Eńbek jánge halyqty áleýmettik qorǵaý mınıstri Tamara Dúısenova Astanada ótken tájik taýarlary jármeńkesindegi dúrbeleń týraly óz oıyn aıtty, dep habarlaıdy QazAqparat tilshisi.

«Premer-Mınıstrdiń áleýmettik ister jónindegi orynbasary retinde tájik taýarlarynyń jármeńkesi týraly, bizdiń azamattardyń qylyǵy týraly pikir bildirińizshi. Bul neni kórsetedi? Mádenıetimiz tómen be álde nashar turyp jatyrmyz ba?», - dep suraq qoıdy tilshiler Úkimet kýlarynda.

«Shynymdy aıtsam, meniń de kóńilim qaldy. Biz, qazaqstandyqtar únemi mádenıetimizben, tózimimizen erekshelenip júrgen edik. Halyqtyń jaǵdaıy tym nashar dep aıta almaımyn. Ondaǵy azamattarymyzdyń bári mundaı qylyq kórsetken joq. Degenmen mundaı oqıǵa oryn aldy, demek ózimizdi túzep, tárbıeleýimiz kerek», - dep jaýap berdi Tamara Dúısenova.

Sonymen birge, mınıstr mundaı oqıǵalardyń tek qana bizdiń elde bolmaıtynyn, basqa elderde de baıqalatynyn aıtty.

«Sondyqtan da biz qazaqstandyqtar retinde óz elimizdiń ımıdji úshin jaýapty ekenimizdi umytpaýymyz kerek», - deıdi Eńbek mınıstri.

Aıta keteıik, jeksenbi kúni EXPO alańynda Tájikstannyń aýyl sharýashylyǵy, ónerkásip ónimderi, ulttyq qolóner buıymdary jáne ulttyq taǵamdarynyń kórme-jármeńkesi ótti.

Keıin Astana ákimdigi de áleýmettik jelige taraǵan vıdeoǵa túsinik bergen edi.