Halyqtyń yqylasyna bólengennen artyq baqyt joq - Elmıra Maqasheva
- Elmıra Jumajanqyzy, osy kezge deıin qandaı basty tabystarǵa qol jetkizdim dep oılaısyń?
- Qıyndyǵy men qýanyshy qatar júretin óner jolyn janyma serik etip, BQO qazaq drama teatrynda eńbek etkenime bıyl 20 jyl boldy. Osy kezge deıin qyryqqa jýyq basty ári negizgi rolderdi somdaǵan ekenmin. Eń alǵashqy súıikti rolderimniń biri G.Hýgaevtyń «Qara shekpenindegi» Qoıan bolsa, Sh.Bashbekovtiń «Shoıyn qatyn» komedııasyndaǵy - Kýmrı, Ó.Boranbaevtyń «Sotanaıdyń sońǵy úılenýindegi» - Kámıla, T.Ahtanovtyń «Kúshik kúıeýindegi» - Botagóz, Bıǵaısha, S.Ahmadtyń «Sýperkelininde» - Sattyhon, A.Tsagarelıdiń «Hanýmasynda» Kabato sııaqty kóptegen rolderde oınadym. 2011 jyly Aqtóbede batysqazaqstandyq teatrdyń gastrolde bolǵan saparynda «Kórermender kózaıymy» atanyp, ıyǵyma qamzol jabylyp, jurtshylyq yqylasyna bólengenim áli esimnen keter emes. 2016 jyly Qyrǵyz Respýblıkasynyń Mádenıet, aqparat jáne týrızm mınıstri A.Maqsutovtyń qurmet dıplomyn alsam, 2017 jyly 27 naýryzda Qazaqstan Respýblıkasy Mádenıet jáne sport mınıstri A.Muhamedıulynyń alǵys hatyna ıe boldym. Sońǵy jyldary peasalardy qazaq tiline aýdarýmen de aınalysyp kelemin. Sonyń ishinde bashqurt dramatýrgi Florıd Býlıakovtyń shyǵarmasy boıynsha «Qysqa ǵumyr» muńdy komedııasyn tárjimalaǵan edim. Bul spektakl «EKSPO-2017» halyqaralyq mamandandyrylǵan kórmesi aıasynda elordada ótken BQO kúnderinde Astana turǵyndaryna kórsetilip, qoshemetke bólendi. Sonymen birge elimizde Astanadaǵy Q.Qýanyshbaev atyndaǵy memlekettik akademııalyq qazaq mýzykalyq drama teatrynda, Qyzylordadaǵy N.Bekejanov atyndaǵy oblystyq mýzykalyq drama teatrynda, Qyzyljardaǵy S.Muqanov atyndaǵy qazaq mýzykalyq drama teatrynda jáne Batys Qazaqstan oblystyq qazaq drama teatrynyń repertýarynda aýdarmalarym júrip jatyr. Yntymaq pen berekeniń altyn qazyǵyndaı, eki ul, bir qyz tárbıelep otyrǵan baqytty otbasynyń birimiz. Osynyń bári úlken tabys, jetistik dep oılaımyn.
- Kishkentaıyńnan neni maqsat tuttyń, armandar oryndaldy ma?
- Bala kezimde sportqa, ádebıetke qushtar bolsam da, ártis bolýdy armandadym. Terezeniń jaqtaýyn sahna etip, jabyndaryn kóterip, ózimdi tanystyryp, án shyrqaıtynmyn. Neshe túrli obrazdardy qııaldap, bıikke samǵaýdy maqsat tuttym. Sonyń bári tústeı bolyp kóringenmen, qazir shyndyqqa ulasty. Jalpy, armandaı bilgen adam sol maqsatyna jetsem dep erekshelenip, soǵan jetý jolynda bar kúsh-jigerin jumsaıdy. Sondyqtan ózim kezdesýlerde jastarǵa «Aldaryńa bıik maqsat qoısańdar, sol úmit-tilekterińniń oryndalýy úshin tynbaı bilim alyp, eńbek etýmen birge kúrese bilgen durys», dep aıtyp júremin.
- Qazaq teatrynda aktrısa retinde qyzmet etip qana qoımaı, aýdarmashylyqpen de aınalysyp júrsiń, munyń syry nede?
- Óner álemi eń qyzyq, eń keremet álem dese de bolady! Aktrısa bola júrip, jumys, otbasy sharýasymen qatar keıde qolym sál bosaǵan kezde shetel shyǵarmalaryn oqyp otyramyn. Sosyn qyzyǵyna berilip oılaımyn osy ádemi qoıylymdar nege qazaq sahnasynda sahnalanbasqa dep. Alǵashynda kishkentaı balalar ertegilerin qazaq tiline aýdara bastadym. Kóne zamannan kele jatqan túrli ult ókilderin, halyq pen halyqty mádenı baılanystyrýdyń bir túri -aýdarmashylyq óner. Aýdarma óneri ońaı emes, sol ult ókiliniń salt-dástúrin, qımyl-qozǵalysyn aınytpaı berip, avtor oıynyń tazalyǵyn saqtaı bilý kerek. Árıne, ózim ártis bolǵandyqtan, ár keıipkerdi oınap otyryp aýdaramyn. Munyń bir syry osynda.
- Qazirgi qazaq óneri (teatr) aldynda turǵan qandaı ózekti máseleler bar dep oılaısyń?
- Bizdiń talǵampaz kórermendi oılandyratyn, tolǵandyratyn shynaıy dúnıeler kóp bolsa dep oılaımyn. Ózge alys-jaqyn shet elderge shyǵyp, tájirıbe almasyp, qosymsha oqytý máselesi de qarjylaı sheshilse, durys bolar edi. Kóp jerde Samal ekeýmizden sizderdiń ataq-dańqyńyz qandaı? dep suraıdy. Bizderde onyń biri de joq, eń bastysy, halyqtyń yqylasyna, qoshemetine bólenip júrgen jandarmyz, sony qanaǵat tutamyz desek, tańqalady. Shyndyǵynda sol halyqtyń baǵasynan artyq baǵa, baqyt joq dep esepteımin. Degenmen bári ýaqytynda baǵalanǵany da durys shyǵar.
- Bir otbasynda qos birdeı ónerli adamnyń bas qosýy qıyndyq týǵyzbaı ma, balalaryńnyń óz jolyńdy qýǵanyn qalaısyń ba?
- Biz otbasymyzda ázirge óner jolyn tańdaǵan úsh adambyz. Joldasym Samal Ábýov Batys Qazaqstan oblystyq qazaq drama teatrynda akter, qoıýshy rejısser bolsa, qyzym Gúldana - «Nazerke» bı ansambliniń bıshisi. Qalǵan eki ulymyzdyń bolashaǵyn ýaqyt kórseter. Degenmen ónerli adamnyń bas qosýy qıyndyq týǵyzbaıdy, qaıta birlesip aqyldasyp jumys jasaýymyzǵa úlken múmkindik, kómek beredi dep bilemin. Jalpy, balalarymyz qandaı mamandyq tańdasa da, óz erikterinde. Biz olarǵa baǵyt kórsetip, ár ýaqytta qoldap otyramyz.
***
Aıta keteıik, Elmıra Jumajanqyzy Maqasheva 1974 jyly Batys Qazaqstan oblysynyń Terekti aýdany Saryómir aýylynda dúnıege kelgen. 1997 jyly Dáýletkereı atyndaǵy Batys Qazaqstan óner ınstıtýtynyń rejısserlyq bólimin támamdap, 1997 jyldan beri Batys Qazaqstan oblystyq qazaq drama teatrynyń sahnasynda búginge deıin taban aýdarmastan ter tógip keledi.
