Halyqtyń únine qulaq asqan utady - Nurlan Sádir

ORAL. QazAqparat – Halyqtyń únine, muń-muqtajyna qulaq túrgennen bılik te jaman bolmaıdy. Bul týraly Oral qalasynda turatyn «Telegeı» qoǵamdyq birlestiginiń jetekshisi, bloger Nurlan Sádir málim etti, dep habarlaıdy QazAqparat tilshisi.

Onyń aıtýynsha, QR Prezıdenti Qasym-Jomart Toqaev Ulttyq qoǵamdyq senim keńesiniń ekinshi otyrysynda qazirgi qoǵamdaǵy kókeıkesti máselelerge toqtaldy.

«Ulttyq qoǵamdyq senim keńesiniń jumysynda ilgerileýshilik bar. Aınaldyrǵan úsh aıdyń ishinde atqarylǵan sharýa, qol jetkizilgen nátıjeler aıtarlyqtaı», - dedi Nurlan Sádir.

Onyń pikirinshe, Prezıdent atap ótkenindeı, mıtıngiler týraly jańa zań jobasynyń daıyndalyp, qabyldanýy beıbit jıyndardyń ótý barysyn retteıtin bolady. Burynǵydaı ruqsat berýdi kútpeı-aq eskertý, jaı habardar etý júıesine kóshse, odan qoǵam da utady.

Ekinshiden, 174-baptyń izgilendirilýi qoǵamdaǵy teke-tiresti azaıtyp, kelisimge kelýge múmkindik beredi. Sol sııaqty Qylmystyq kodekstiń 130-babyn (jala jabý, sóz erkindigi) ákimshilik aıypqa aınaldyrý da kóńilden shyqty.

«Saıası partııalar ashý úshin músheler sanynyń 40 myń emes, 20 myńǵa deıin qysqarǵany jaqsy. Biraq Qazaqstan úshin bul da kóp dep oılaımyn. Qatarynda úsh-tórt myń adamy bar partııa da kóp nárseni tyndyra alady. Eń bastysy, sanda emes, sapada. Qoryta aıtqanda, Ulttyq qoǵamdyq senim keńesiniń ekinshi otyrysynda qabyldanǵan sheshimder – qoǵam úshin edáýir progress. Alda sheshimin kútip turǵan máseleler de óte kóp. Ony birlesip sheshýge bılik te, halyq ta múddeli bolýy kerek», - dedi qoǵamdyq birlestik jetekshisi.