Halyqtyń týberkýlez dertine shaldyǵýy 5,8 paıyzǵa tómendedi
ALMATY. 2 sáýir. QazAqparat - Qazaqstanda halyqtyń týberkýlez dertine shaldyǵýynyń kórsetkishi 2012 jyly 100 myń adamǵa shaqqanda 86,6-dan 82,7-ge deıin 5,8 paıyzǵa tómendedi.
Bul týraly búgin Almatyda týberkýlezdiń aldyn alý jónindegi respýblıkalyq aılyqty jáne Dúnıejúzilik týberkýlezben kúres kúnin ótkizý qorytyndysy boıynsha bolǵan baspasóz májilisinde aıtyldy.
QR Densaýlyq saqtaý mınıstrliginiń Salaýatty ómir saltyn qalyptastyrý máseleleri jónindegi ulttyq ortalyǵynyń dırektory Jamılıa Battaqovanyń sózine qaraǵanda, jyl saıyn týberkýlezge shaldyǵatyn adamdardyń sany azaıyp keledi.
Degenmen Qazaqstanda týberkýlezge shaldyǵý jáne onyń saldarynan bolatyn ólim-jitim de uzaq ýaqyttan beri memlekettik mańyzǵa ıe kókeıtesti jáne sheshimi qıyn másele bolyp tabylady.
QR Densaýlyq saqtaý mınıstrliginiń Týberkýlez máseleleri jónindegi ulttyq ortalyqtyń dırektoryTileýhan Ábildaevtyń aıtýynsha, týberkýlezdiń aldyn alý jónindegi is-sharalar keshenin sátti oryndaýdyń nátıjesinde 2003 jyldan bastap respýblıkada onyń turaqty tómendep kele jatqany baıqalyp otyr. 2012 jyldyń qorytyndysy boıynsha osyndaı belgilerge jatatyn aýrý-syrqaý men ólim-jitim kórsetkishi «Salamatty Qazaqstan» densaýlyq saqtaý salasyn damytý memlekettik baǵdarlamasynda belgilengen kórsetkishterden tómen boldy. Máselen týberkýlez dertiniń saldarynan bolatyn ólimniń 100 myń adamǵa shaqqandaǵy kórsetkishi 2011 jyly 8,4 paıyz bolsa, 2012 jyly 7,2-ni qurap, 2,5 paıyzǵa tómendedi.
