Halyqtyń teńgege degen senimi kúsheıip keledi - Aqyshev
ASTANA. QazAqparat - Qazaqstandyqtar birtindep dollardan ulttyq valıýtaǵa aýysyp keledi. QR Ulttyq bankiniń tóraǵasy Danııar Aqyshev osylaı málim etti dep xabarlaıdy QazAqparat tilshisi.
«Halyqtyń teńgege degen senimi kúsheıip keledi. Máselen, qańtar-aqpan aılarynda teńgemen saqtalatyn depozıtterdiń jalpy kólemi 0,3 paıyzǵa ósti. Al sheteldik valıýtanyń depozıtteri 11,5 paıyzǵa azaıdy», - dedi Aqyshev Úkimettiń búgingi otyrysynda.
Onyń sózine qaraǵanda, zańdy tulǵalardyń shetel valıýtasymen saqtap otyrǵan depozıtteri 45,8 paıyzǵa deıin tómendese, jeke tulǵalardyń valıýtalyq depozıtteri 58,8 paıyzǵa deıin tústi. «Al el ekonomıkasyn nesıelendirý máselesine keler bolsaq, bıyl qańtar-aqpan aılarynda ótken jyldyń atalǵan kezeńimen salystyrǵanda, berilgen nesıelerdiń kólemi 7,9 paıyzǵa ulǵaıdy. Osy oraıda zańdy tulǵalar úshin teńgemen berilgen nesıe stavkasynyń 14,3 paıyzǵa tómendegenin atap ótken jón. Bul - 2015 jyldyń tamyzynan bergi eń tómengi stavka», - dep atap kórsetti bas bankır.
Aıta keteıik, Úkimettiń búgingi otyrysynda elimizdiń áleýmettik-ekonomıkalyq damýy boıynsha alǵashqy úsh aıdyń qorytyndysy qaraldy. QR Ulttyq ekonomıka mınıstri Tımýr Súleımenovtyń aıtýynsha, búginde xalyqtyń nesıeni teńgemen kóptep ala bastaǵany baıqalady.
