Halyqtyń tabysy tómendese de, tutynýshylyq suranys azaımaı tur – Pirmatov
ASTANA. QazAqparat – Qańtar aıynda negizgi kapıtalǵa baǵyttalǵan ınvestıtsııalar 18,3%-ǵa deıin ósken. Bul jaıynda Ulttyq bank tóraǵasy Ǵalymjan Pirmatov bazalyq mólsherleme jóninde ótken brıfıngide aıtty, dep habarlaıdy QazAqparat tilshisi.
«Bıylǵy qańtarda Qazaqstanda naqty jalpy ishki ónimniń ósý qarqyny ótken jylǵy tómen baza sebebinen 5,6% boldy. Taýar óndirisi 2,3%, qyzmet kórsetý salasy 7,6% ósti. Barlyq negizgi salalar boıynsha oń dınamıka baıqalýda. Eń jaqsy kórsetkishter saýda (+ 19,4%), aqparat pen baılanys (+ 18,1%), sondaı-aq qurylys (+ 12,5%) salasynda oryn aldy.
Inflıatsııanyń aıtarlyqtaı ósýine jáne halyqtyń naqty tabysynyń tómendeýine qaramastan, tutynýshylyq suranys áli de oń qalpynda qalyp otyr. Tutynýshylyq kredıtteýdiń ósýine, joǵary ınflıatsııalyq kútýlerge oraı azyq-túlikke jatpaıtyn taýarlar saýdasynyń ósýi saqtalýda. Bul azyq-túlikke jatpaıtyn ımporttyń artýyna ákeledi», m- dedi Ulttyq bank basshysy.
Onyń málimeti boıynsha, qańtar aıynda negizgi kapıtalǵa baǵyttalǵan ınvestıtsııalar 18,3%-ǵa deıin ósip otyr.
«Atap aıtqanda, ónerkásipke qarajat salý kólemi 9,2%, aýyl sharýashylyǵynda – 33,7%, jyljymaıtyn múlik operatsııalarynda – 33,7%, kólik pen qoımada saqtaý salasynda – 31,8% ósti», - dedi Ǵalymjan Pirmatov
Aıta keteıik, Ulttyq banktiń aqsha-kredıt saıasaty komıteti bazalyq mólsherlemeni 16,75% deńgeıinde qaldyrý týraly sheshim qabyldady.
