Halyqtyń shildedegi ataýly aqshalaı tabysy belgili boldy

NUR-SULTAN. QazAqparat – 2019 jylǵy shildede halyqtyń ataýly aqshalaı tabysy 100 myń teńgeden asty. Bul jaıynda QR UEM Statıstıka komıtetinen málim etti, dep habarlaıdy QazAqparat tilshisi.

«2019 jylǵy shildede halyqtyń orta eseppen jan basyna shaqqandaǵy ataýly aqshalaı tabystary baǵalaý boıynsha 100 982 teńgeni qurady. Bul 2018 jylǵy shildege qaraǵanda 6,9 paıyzǵa joǵary. Atalǵan kezeń ishinde naqty aqshalaı tabystar 1,4 paıyzǵa ósti, - delingen vedomstvo málimetinde.

Komıtet aqparatyna sáıkes, 2019 jylǵy shildede halyqtyń ataýly aqshalaı tabystarynyń qurylymynda jaldamaly jumyspen qamtylýdan túsken tabys 71,9, jeke kásipkerlik qyzmetten túsken tabystar - 10,7, áleýmettik transfertter túrindegi tabystar – 16,7 jáne ózge de aqshalaı tabystar 0,7 paıyzdy quraǵan.