Halyqtyń shaǵymynan soń Qaraǵandy ákimine sógis jarııalandy
QARAǴANDY. QazAqparat - Qaraǵandy oblysynyń ákimi Erlan Qoshanov oblys ortalyǵynyń sanıtarlyq jaǵdaıyn tekserý barysynda Qaraǵandy basshysy Nurlan Áýbákirovke sógis jarııalady, dep habarlaıdy QazAqparat.
Oblys ákimdiginiń baspasóz qyzmetinen málim etkendeı , Erlan Qoshanov qala shetindegi aýmaqtardy aralap kórgennen keıin osyndaı qorytyndy jasaǵan.
«Óńir basshysy konteınerlik alańdardyń aınalasyndaǵy qoqys, abattandyrý jumystarynyń nasharlyǵyna qatysty turǵyndar tarapynan shaǵym kelip túsken Maıqudyq jáne Prıshahtınsk shaǵynaýdandarynyń aýlalaryn kórip qaıtty. Jýyrda jergilikti telearnanyń birinde Prıshahtınskiniń 21-shi yqsham aýdannyń turǵyndary «100 aýla» baǵdarlamasy boıynsha júzege asyrylǵan abattandyrý jumystarynyń sapasyna narazylyǵyn bildirgen beınesıýjet shyqqan bolatyn. Turǵyndar aýlany qalypqa keltirý barasynda jaryqtandyrý júıesi ornatylmaǵanyna, qoqys salatyn konteınerlik alańǵa baratyn joldyń joqtyǵyna shaǵymdandy.
Erlan Qoshanov jaǵdaıdy óz kózimen kórý úshin osy aýlaǵa bardy. Oblys ákimi 11-shi úıdiń turǵyndarymen sóılesken soń, aýdan jáne qala basshylyǵyna syn aıtty», - delingen ákimdik aqparatynda.
«Biz oblystyq bıýdjetten «100 aýla» baǵdarlamasyna aqsha bóldik. Al sizder olardyń jumsalýyn qalaı baqylap otyrsyzdar? Bul bastama adamdarǵa yńǵaılylyq syılaý úshin qurylǵan. Alaıda, bul aýlada kerisinshe jaǵdaı buryńǵydan da nashar bolyp otyr», - dep narazylyǵyn bildirdi oblys ákimi.
Ol barlyq kemshilikterdi joıýdy talap etti. Osyndaı abattandyrý nátıjesinde Prıshahtınsk turǵyndary mektepke aparatyn joldardan aıyryldy. Burynǵy asfalt alyp tastalǵan, al jańasy sol beti tóselmegen. Oblys ákimi bul máselege qatysty da tártip ornatýdy tapsyrdy.
«Sizderde ótken jyldan beri qalǵan qoqys búkil qala boıynsha jaıylyp jatyr. Kez kelgen aýlaǵa baryńyz, sanıtarlyq jaǵdaıdan túrshigýge bolady. Men mundaı las Qaraǵandyny buryn-sońdy kórgen emespin. Múldem bosańsyp kettińizder!», - dedi Erlan Qoshanov qala bıligine qarata.
«Sizge, Nurlan Erikbaıuly (Qaraǵandy qalasynyń ákimi) sógis jarııalaımyn», - degen ol, qala basshysy men onyń qaramaǵyndaǵylardyń jumysyna nashar baǵa berdi. Al qalalyq máslıhattyń hatshysynan depýtattar búkil qalany aralap, ákimdiktiń jumysyna óz baǵasyn berýin ótindi.
