Halyqtyń shaǵymynan keıin jabylaıyn dep jatqan Beloýsovka kenishine tekserý júrgizildi

ÓSKEMEN. QazAqparat – Shyǵys Qazaqstan oblysyny Glýbokoe aýdanyndaǵy Beloýsovka kenishiniń jabylýyna qatysty turǵyndar shaǵymynan soń tekserý júrgizildi, dep habarlaıdy QazAqparat tilshisi.

Aýdan turǵyndary kenishtiń jabylýyna qatysty narazylyq bildirip, Prezıdent Qasym-Jomart Toqaevtyń atyna hat joldaǵan.

Olardyń aıtýynsha, sonyń saldarynan 400-ge jýyq adam jumyssyz qalady.

Kenshiler geologııalyq barlaý júrgizilgenin, áli de onda qor bar ekendigin aıtqan edi.

Al kenishti tabıǵatqa zalal keltirmeıtindeı qylyp jabýdy «BM Mining» JShS óz mindetine almaq.

ShQO ekologııa departamentiniń málimetinshe, osyǵan oraı ótken qoǵamdyq tyńdaýda «BM Mining» JShS «Beloýsovka ken ornynda taý-ken jumystaryn júrgizý saldaryn joıý» jobasyn tanystyrdy.

«Kompanııa ókilderi jobany ázirleý barysynda halyqtyń qaýipsizdigi, onyń ishinde ekologııalyq qaýipsizdikti qamtamasyz etý úshin barlyq qajetti shara qarastyrylǵanyn jetkizgen. Alaıda halyq kenishtiń merziminen buryn jabylatyndyǵyna qarsylyq tanytty. Ekologtar tekserý júrgizip, bul jobaǵa teris baǵa berdi. Sebebi ken qazbalaryn joıýdyń balama nusqalarynyń joqtyǵy, shlam qaldyqtarynyń kóleminiń ulǵaıýy jáne shahta sýyn tazartý dárejesiniń jobalyq kórsetkishteriniń joqtyǵy anyqtaldy», - delingen aqparatta.

Osyǵan oraı endi aldaǵy ýaqytta qoǵamdyq tyńdaý qaıtadan ótkizilmek.