Halyqtyń ótken jylǵy ataýly aqshalaı tabysy qansha

ASTANA. QazAqparat - 2016 jyly halyqtyń orta eseppen jan basyna shaqqandaǵy ataýly aqshalaı tabystary 76575 teńgeni qurap, 2015 jylmen salystyrǵanda 13,7 paıyzǵa ósti. Bul jaıynda QR Ulttyq ekonomıka mınıstrliginiń baspasóz qyzmetinen habarlady.

Vedomstvo málimetinshe, atalǵan kezeńdegi tutyný taýarlary men kórsetiletin qyzmetterge baǵalar 14,6 paıyzǵa qymbattap, halyqtyń naqty aqshalaı tabystary aldyńǵy jylmen salystyrǵanda 0,7 paıyzǵa tómendedi.

«2016 jyly halyqtyń orta eseppen jan basyna shaqqandaǵy ataýly aqshalaı tabystarynyń mólsheri boıynsha joǵary mán Atyraý oblysynda baıqaldy. Onda bul kórsetkish ortasha respýblıkalyq deńgeıden 1,9 esege artty. Tabysy eń tómen óńirler retinde Ońtústik Qazaqstan jáne Jambyl oblystary belgilendi. Atalǵan óńirlerdegi halyqtyń tabys mólsheri ortasha respýblıkalyq deńgeıdiń 56-63 paıyzdy quraıdy», - delingen mınıstrlik taratqan aqparatta.

Sonymen qatar 2016 jyly óńirler boıynsha halyqtyń orta eseppen jan basyna shaqqandaǵy ataýly aqshalaı tabystarynyń eń joǵarǵy jáne eń tómengi shamasy arasyndaǵy aıyrmashylyq 3,3 eseni qurady.