Halyqtyń orta jasy ósse, onkologııalyq aýrýlar kóbeıe beredi
ASTANA. QazAqparat - Qazaqstanda onkologııalyq aýrýlarǵa shaldyqqandardyń sany 150 myńnan asyp ketti. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Densaýlyq saqtaý jáne áleýmettik damý mınıstrliginiń bas onkology, Qazaq onkologııa jáne radıologııa ǵylymı-zertteý ınstıtýtynyń dırektory Qýanysh Nurǵazıev málim etti.
«2012 jyldyń qańtar aıynda Elbasy óz Joldaýynda onkologııa salasyn damytýǵa zor kóńil bóldi. Óıtkeni, halyqtyń ólim-jitimi sebepteriniń arasynda onkologııalyq aýrýlar ekinshi orynda tur. Odan keıin Úkimet qaýly qabyldap, memlekettik baǵdarlama ázirledi. 2012 jyldyń 29 naýryzynda qabyldanǵan baǵdarlama bes jylǵa arnalǵan. Onda 69 sharany júzege asyrýǵa 211 mlrd. teńge qarastyrylǵan. Qazirgi ýaqytta sol baǵdarlamanyń úshinshi jyly aıaqtalýda», - dedi ol.
Elimizdiń bas onkologynyń sózine qaraǵanda, búginde Qazaqstanda onkologııalyq aýrýlarǵa shaldyqqandardyń sany 150 myńnan asyp otyr.
«Jyl saıyn elimizde onkologııalyq aýrýlarǵa shaldyqqandardyń qatary artyp keledi. Sebebi, halyqtyń orta jasy ósý ústinde. Adamnyń orta jasy ósse, onkologııalyq aýrýlar kóbeıe beredi. Degenmen, qazirgi ýaqytta onkologııalyq aýrýlardan shetineý kórsetkishi tómendep keledi», - dedi Q.Nurǵazıev.
Onyń atap ótýinshe, máselen, 100 myń adamǵa shaqqanda onkologııalyq aýrýlardan qaza bolǵandar sany 99,4 bolsa, qazir 94-ke tómendetilgen.
