Halyqtyń ómir súrý sapasyna, qarttardy qoldaýǵa arnalǵan memlekettik baǵdarlama qabyldansa ıgi
ASTANA. 30 qańtar. QazAqparat - Qazaqstan Respýblıkasy halqynyń ómir súrý sapasy men joǵary belsendi uzaq ómir súrýi týraly memlekettik baǵdarlama qabyldaý kerek. Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Saǵııatýlla Sársenov osylaı málim etti.
«Memleket basshysy atap ótkendeı, kedeıshilik deńgeıiniń edáýir azaıýynyń jáne halyqtyń ál-aýqatynyń ósýiniń arqasynda búgingi tańda, Qazaqstanda ómir súrý ortasha uzaqtyǵy 70 jasqa deıin ósti. Qazaqstandyqtar jas ult bolǵandyqtan, biz ata-analarymyzdyń laıyqty túrde uzaq ómir súrýine quqyqtyq alǵysharttar jasaýymyz qajet. Bul máseleniń moraldyq jaǵyna eshkim kúmán keltire almasy anyq. Uzaq ómir súrý týraly aıtqan kezde biz, birinshi kezekte, belsendi túrde jáne shyǵarmashylyq turǵydan ómir súrý, naqty aıtqanda sapaly ómir súrý týraly aıtýǵa tıispiz», - deıdi depýtat. Onyń aıtýynsha, qartaıýdyń medıtsınalyq problemalaryn sheshýdiń anaǵurlym qolaıly joly - qartaıýǵa baılanysty jáne eńbek etý qabiletinen aıyrylýǵa ákeletin aǵzadaǵy ózgeristerdiń aldyn alýǵa jáne baıaýlatýǵa baǵyttalǵan belsendi is-qımyl jasaý baǵdarlamalaryn qurý. Al osy saladaǵy mańyzdy baǵyt - egde jastaǵy kisilerge emdeý, ońaltý, qaıtalama profılaktıka baǵdarlamalaryn ázirleý jáne engizý bolyp tabylady.
«Qazaqstanda egde jastaǵy adamdardyń problemalaryn keshendi túrde sheshýge tikeleı baǵyttalǵan baǵdarlamalar men jobalar joq. Bul rette qart adamdarmen jumys isteıtin uıymdar men mekemeler arasyndaǵy vedomstvoaralyq baılanystyń álsizdigin jáne olardyń ózara is-qımyl jasaý tetiginiń kúrdeliligin atap ótý qajet. Endeshe memlekettiń basty maqsaty - azamattardyń belsendi uzaq ómir súrýi úshin jaǵdaı jasaý bolýy tıis», - deı kele depýtat bul baǵytta arnaıy baǵdarlama qabyldap, máseleni zańnamalyq turǵyda bekitý qajettigin alǵa tartty.
