Halyqtyń naqty tabysyn kóterý: Saǵyntaev óńir basshylarynan jaýap aldy
ASTANA. QazAqparat - QR Premer-Mınıstri Baqytjan Saǵyntaev naqty aqshalaı tabysy boıynsha tómen nátıje kórsetken óńirlerdi synǵa aldy, dep habarlaıdy QazAqparat tilshisi.
QR Ulttyq ekonomıka mınıstri Tımýr Súleımenov keltirgen derekterge sáıkes, jyl basynan beri Almaty, Mańǵystaý Qyzylorda oblystary men Almaty qalasynda halyqtyń naqty aqshalaı tabysy azaıǵan.
«Bizdiń kórsetkishterimiz jyl sońyna deıin oryndalady. Byltyrǵymen salystyrǵanda keıbir kásiporyndarda óndiris kólemi tómendedi, biraq jyl sońyna deıin bul kórsetkishter jaqsarady dep boljap otyrmyz. Eki aıdyń ishinde jaǵdaıdy durystaýǵa tyrysamyz», - dep jaýap berdi Almaty oblysynyń ákimi Amandyq Batalov.
Úkimet basshysy oblys ákimine bir aı ǵana ýaqyt qalǵanyn aıtty.
«Elbasynyń qoıyp otyrǵan talaby - birinshi kezekte halyqtyń naqty tabysyn kóterý. Óńirlerge ádeıi suraq qoıyp otyrmyn. Ár aıdyń qorytyndysy boıynsha esep bergende, aldymen osyǵan kóńil bólińizder», - dep eskertti Premer-Mınıstr.
Almaty qalasynyń ákimi Baýyrjan Baıbek statıstıkalyq derekte qate ketti dep túsindirdi.
«Jalpy, naqty tabys boıynsha ekinshi toqsanda ósim baıqalady. Qate ketken shyǵar. Statıstıka basshysy qasymda otyr. Alataý aýdanynda - 4,5%, Alataý aýdanynda - 0,6%, Áýezov aýdanynda - 5,8%, Jetisý - 5,1%, Medeý - 100% ósim bar. Bizde tómen tartyp otyrǵan tek jańadan qosylǵan Naýryzbaı aýdany. Jalpy bıýdjet ıgerilimi jyl sońyna deıin 100% jetedi», - dedi Baýyrjan Baıbek.
Sonymen birge, Úkimet basshysy Qyzylorda jáne Mańǵystaý oblystarynyń ákimderin tyńdap shyqty jáne jaýapqa kóńili tolmaǵanyn jetkizdi.
«Shyn máninde, jaýaptaryńyz joq. Bári sol «statıstıkanyń málimeti durys emes» degen áńgimege tireledi. Bolmasa, ortasha jalaqy joǵary deısizder. Al halyqtyń naqty tabysy tómen. Oǵan ne sebep? Soǵan aldaý jasaý kerek. Bul birinshi kezekte quzyretti organdar: Eńbek jáne halyqty áleýmettik qorǵaý mınıstrligi men jergilikti ákimdikterdiń jumysy. Kelesi joly 11 aıdyń qorytyndysy boıynsha otyrysta barlyqtaryńyz osy suraqqa jaýap berýge daıyn bolyńyzdar», - dep tapsyrma berdi Baqytjan Saǵyntaev.
