Halyqtyń múddesine saı saıasat júrgizý óte mańyzdy - Toqaev

NUR-SULTAN. QazAqparat - Memleketimizdi baqýatty elge aınaldyryp, azamattardyń turmys sapasyn jaqsartý - ulttyq strategııamyzdyń basty maqsaty. Bul týraly búgin Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Biz Táýelsizdik jyldarynda jalpy ulttyq birlik rýhyn kúsheıttik. Tórtkúl dúnıede bolyp jatqan ózgeristerge qarasaq, munyń asa mańyzdy ekenin jaqsy túsinemiz. Qazirgi tańda álem qoǵamdastyǵy sońǵy 50 jyldaǵy eń kúrdeli senim daǵdarysyn bastan ótkerýde. Bul - turaqtylyq pen yntymaqqa qaýip tóndiretin úrdis», - dedi Memleket basshysy.

QR Prezıdenti azamattar men memleket ınstıtýttary arasyndaǵy qarama-qaıshylyqtar da ýshyǵyp turǵandyǵyna basa nazar aýdartty.

«Kúlli álem jurtshylyǵy turmys sapasyn jaqsartýdy, teń múmkindikter berýdi jáne memlekettiń ashyqtyǵyn talap etýde. Qazaqstan – osy álemniń bir bóligi. Sondyqtan bul máselelerdiń bizdiń elimizge de qatysy bar. Osyndaı jaǵdaıda jalǵan urandarǵa sengen eldiń bereke-birlikten aıyrylǵanyna kýá bolyp otyrmyz. Sondyqtan jaǵymsyz áreketterge der kezinde nazar aýdaryp, halyqtyń múddesine saı saıasat júrgizý óte mańyzdy», - dedi Qazaqstan Prezıdenti.

Qasym-Jomart Toqaev eń aldymen elimizdiń tuǵyry árqashan myqty bolýy kerektigin basa aıtty.

«Al, bul halqymyzdyń tatýlyǵyna baılanysty. Birlik bar jerde tirlik bar. Memleketimizdi baqýatty elge aınaldyryp, azamattardyń turmys sapasyn jaqsartý – ulttyq strategııamyzdyń basty maqsaty», - dedi Memleket basshysy.