Halyqtyń qyraǵylyǵy lańkesterdi toqtatty
Ulttyq qaýipsizdik komıtetiniń baspasóz qyzmeti habarlaǵandaı, Gúlshat aýylynda qylmyskerlerdi ustaý barysynda terrorshylardyń bireýi óz-ózin jaryp jiberip, alǵan jaraqattardan kóz jumdy. Basqa qurbandar men zardap shekkender joq. «Toptyń basqa músheleri ustaldy. Jarylǵysh qurylǵy quraýyshtary, dárimen atylatyn qarý jáne ózge zattaı aıǵaqtar alyndy. Atalǵan fakti boıynsha sotqa deıingi tergeý bastaldy. Tergeý is-sharalary jalǵasýda»,- dep habarlady UQK-niń baspasóz qyzmeti.
«Balqash oqıǵasy» boıynsha qylmystyq jaýapkershilikke tartylǵandardyń barlyǵy Qazaqstan úshin dástúrli emes «salafızm» dinı aǵymyn ustanýshylar ekeni belgili boldy. Qazirgi kezde olardyń DAISh halyqaralyq lańkestik uıymmen baılanysynyń bar-joǵy tekserilýde. Atap aıtarlyǵy, olardyń lańkesterdiń ıdeologııalyq yqpalynda bolǵany (DAISh uıymynyń ıdelogııasymen ýlanǵany) naqty anyqtalyp otyr. Budan shyǵatyny, lańkesterdiń kózdegeni - ramazan aıynda terrorlyq akti jasaý. Sebebi olardyń túsiniginshe, «oraza aıynda jasalǵan mundaı áreketti búkil álemdegi terrorshylar men dinı ekstremıster joǵary baǵalaıdy».
Quzyrly organnyń shaǵyn habarynan belgili bolǵany, lańkester Qaraǵandy oblysynyń aýmaǵynda terakti josparlaǵan. Bul aqparatty sál keıinirek UQK-niń basshysy Vladımır Jumaqanov rastady. - Alty adam ustaldy, onyń bireýi ózin jaryp jiberdi. Ustalǵandardyń barlyǵy jergilikti turǵyndar, Qazaqstan azamattary. Salafıttik aǵymdy ustanýshylar,- dep málimdedi V. Jumaqanov Parlament dálizinde jýrnalısterge bergen jaýabynda. Bes qylmyskerdiń tergeý aıaqtalǵansha abaqtyǵa qamalǵany málim boldy. Bul jóninde Qaraǵandy oblystyq soty habarlady.
Qazaqstan Respýblıkasynyń Qylmystyq kodeksiniń 257 babynyń 1 bólimine, 287 babynyń 5 bólimine sáıkes, 5 lańkeske terrorlyq top quryp, zańsyz jolmen qarý-jaraq, oq-dári, jarylǵysh zattar men qurylǵylar tasymaldady degen aıyp taǵyldy. Qamalǵandardyń úlkeniniń jasy 37-de, kishisi - 26-da. Kúdiktilerdiń barlyǵy - Qaraǵandy oblysynyń týmalary. Lańkestiń toptyń 2016 jyldyń sáýir aıynda qurylǵany málim boldy. Topqa «ámir» jetekshilik etken. Dástúrli emes dinı ıdeologııany ustanǵan Balqash turǵyny atalǵan topqa óziniń nıettesterin tartqan. Atap aıtarlyǵy, toptyń ár múshesiniń atqaratyn róli men mindetteri bolǵan. Mysaly, bireýi jarylǵysh zat, ekinshi bireýi aqsha izdese, úshinshisi ózdiginen jarylatyn qurylǵy daıyndaǵan. Oqıǵaǵa kýá bolǵan jergilikti turǵyndardyń biri ózin-ózi jaryp jibergen lańkestiń Gúlshat kentinde týyp-óskenin áńgimeledi. Ákesiz ósken jigitti anasy ósirip-jetkizipti. Mektepti támamdaǵannan keıin Balqashqa qonys aýdarady. Al Gúlshatqa óz anasynyń hálin bilýge barǵan kórinedi.
Lańkestik toptyń aram nıetine tosqaýyl qoıǵan arnaıy qyzmet organdarynyń biliktiligi ekeni daýsyz. Alaıda halyqtyń qyraǵylyǵy lańkesterdi toqtatty desek esh qatelespeımiz. Álbette qoǵamnyń, memlekettiń tynyshtyǵyna qaýip tóngen kezde el turǵyndarynyń birligi men tutastyǵy, belsendi azamattyq ustanymy úlken mańyzǵa ıe. Terrorızm sııaqty asa qaýipti qubylyspen memleket jáne azamattyq qoǵam deńgeıinde toptasyp kúresýdiń nátıjesi de zor bolatyny aıdan anyq. Sol sebepten «Balqash oqıǵasynan» sabaq ala otyryp, dástúrli emes ıdeologııany ustanýshylardyń is-qımylynan kúdikti jaǵdaılardy baıqaǵan árbir otandasymyz der kezinde quzyrly organdarǵa habar berýi tıis.
Aǵymdaǵy jyldyń 10 maýsymynda Nursultan Nazarbaevtyń tóraǵalyǵymen ótken Qaýipsizdik Keńesiniń otyrysynan keıin el Prezıdentiniń bergen tapsyrmalaryn oryndaý jónindegi vedomstvoaralyq jumys toby qurylyp, iske kiristi. Eń bastysy terrorızm jáne dinı ekstremızm qubylystarymen kúresýge jáne onyń aldyn alýǵa múddeli barlyq quzyretti organdardyń jumysy, kúshi bir jerge jumyldyryldy. Memleket basshysynyń ózi qadap aıtqandaı, Qazaqstandaǵy tynyshtyq pen turaqtylyqtyń saqtalýyn qamtamasyz etý úshin bizde barlyq múmkindikter, resýrstar, adamdar jetkilikti ekenin umytpaǵanymyz abzal.
