Halyqtyń quqyq qorǵaý organdary qyzmetkerlerine degen oıyn ózgertý kerek – ardager polıtseı
NUR-SULTAN. QazAqparat – Serik Isaev biraz jyldar ishki ishter organdarynda qyzmet etken. Kezinde krımınalıst bolǵan, al búginde zeınette. Osy oraıda QazAqparat tilshisi ishki ister organdarynda eleýli eńbek etken maman retinde elde bolǵan jappaı tártipsizdikterge qatysty ardagermen tildesken edi.
Serik Maǵzumuly ishki ister organdaryna 1979 jyly kelgen. Basynda jumysqa laborant bolyp kirip, keıin mılıtsııa, sarapshy, bólim basshysynan krımınaldyq departament dırektoryna deıingi qyzmetterdi atqarǵan.
1997 jylǵa deıin Almatyda eńbek etip, odan keıin qyzmet babymen jańa elordaǵa aýysqan. 2010 jyldan bastap qurmetti demalysta.
«Beıbit mıtıng barlyq elde bolady. Ony ótkizýdiń erejesi bar. Bizdegi jaǵdaıǵa kelsek, basy beıbit sherýden bastaldy, sońy jappaı tártipsizdikterge ulasty. Bul durys emes. Alys-jaqyn elderde bolyp jatqan túrli deńgeıdegi tóńkeristerden-aq sońy nemen aıaqtalatynyn kórip júrmiz. Buzaqylyq pen jappaı tártipsizdikter elge esh abyroı ákelmeıdi. Kerisinshe eldiń damýyna artqa 20-25 jylǵa shegerip tastaıdy. Biz óz-ózimizdi tonadyq degen sóz. Sebebi, qıraǵan dúnıeni qaıta qalpyna keltirý kerek. Ol úshin memlekettik bıýdjetten qarjy bólinedi. Al memlekettik bıýdjet aınalyp kelgende halyqtyń qazynasy. Onyń ústine keıbir buzaqylar isin moıyndamaı jatyr, sonda kim ony istegen? Sol ózimizdiń turǵyndar», - dedi Serik Isaev.
Onyń aıtýynsha, óskeleń urpaq arasynda ıdeologııalyq jumystardy jıi uıymdastyrý qajet.
«Árıne, kez kelgen azamattyń zań boıynsha talap etýge quqyǵy bar. Biraq, shekten shyqpaý kerek. Qarap otyrsańyz, alańǵa shyqqandardyń deni jas azamattar. Sondyqtan da aıtarym, jastar arasynda túsindirý jumysyn jandandyrǵan jón», - deıdi ol.
Sondaı-aq, zeınettegi krımınalıst jappaı tártipsizdikter kezindegi ishki ister organdarynyń áreketine qatysty pikir bildirdi.
«Memleket belgili bir jaǵdaıda kúsh kórsete alady. Jáne kúsh qoldaný kerek. Ol halyqty qyrý degen sóz emes, kerisinshe qalyń jurttyń qaýipsizdigi úshin. Meniń oıymsha, jappaı tártipsizdikterdiń aldyn alýǵa bolar edi, biraq múmkindikti ýysynan jiberip aldy. Buzaqy jasaýshylar memleketten, bılikten seskengeni jón. Sebebi bıliktiń qoly uzyn. Al bizdikiler bolsa, jumsaqtyq tanytty. Óńirlerdegi jaǵdaıǵa kelsek te sol. Jergilikti quqyq qorǵaý organdarynyń basshylary joǵarydan buıryq kútip otyrdy. Ondaı jaǵdaıda shuǵyl sheshim qabyldap, máseleni sol jerde sheshý kerek. Quzyretiń ruqsat berip tur, qol astyńda qyzmetkerleriń bar», - deıdi burynǵy tártip saqshysy.
Odan bólek, S. Isaev ishki ister organdary qyzmetkerleriniń mártebesin kóterý kerektigin alǵa tartty.
«Bizdiń kezimizde «mılıtsııa» degen sózben bári qorqatyn. Jáne syıly mamandyq edi. Qazir jaǵdaı basqasha. Olardyń mártebesin ósirip, halyqtyń quqyq qorǵaý organdary qyzmetkerlerine degen oıyn ózgertý kerek. Sonymen qatar tártip saqshylaryn jumysqa alý talabyn qatańdatý da kerek. Óz basym mılıtsııa bolý úshin 3-4 jyl rezervte turdym, sodan soń ǵana buıyrdy», - dedi ol.
Sóz sońynda ardager elimizge tynyshtyq tilep, Memleket basshysy júktegen mindetterdiń oryndalatynyna senim artty.
