Halyqtyń kredıt alýyn tómendetý boıynsha qandaı sharalar qabyldanýda

ASTANA. QazAqparat – Qazaqstanda azamattardyń nesıe alýyn azaıtý jolynda qandaı sharalar qabyldanyp, iske asýda. Bul týraly tolyǵyraq QR Qarjy naryǵyn retteý jáne damytý agenttiginiń tóraǵasy Mádına Ábilqasymova aıtyp berdi, dep habarlaıdy QazAqparat tilshisi.

«Azamattardyń tutynýshylyq kredıtter boıynsha beresheginiń ósýin shekteý úshin ótken jyldan bastap jeke tulǵalardyń 3 aı boıy tólenbeı kelgen qaryzdary men mıkrokredıtterine syıaqy esepteýge tyıym salyndy. Nátıjesinde ótken jyly 45 kúnge 50 AEK kóleminde kepilsiz mıkrokredıtter boıynsha syıaqynyń shekti mólsherlemesi 30%-dan 20%-ǵa deıin tómendetildi. Sondaı-aq mıkroqarjy uıymdarynyń qyzmetine tekserý júrgizildi. Onyń qorytyndysy boıynsha talaptardy saqtamaǵan 23 mıkroqarjy uıymynyń lıtsenzııasy qaıtaryp alyndy», - dedi Mádına Ábilqasymova Úkimet otyrysynda.

Agenttik basshysynyń aıtýynsha, tutynýshylyq kredıt berý koeffıtsıenti zaım alýshynyń jıyntyq kirisiniń 50%-y deńgeıinde belgilendi. Sondaı-aq tabysy kúnkóris deńgeıinen tómen azamattarǵa nesıe berýge tyıym salyndy.

«2022 jyly borysh júktemesi koeffıtsıenti prýdentsııalyq normatıv retinde belgilendi. Atalǵan normatıvti bankter men mıkroqarjy uıymdary qatań saqtaýy tıis. Sonymen birge nesıe alýshynyń kirisin esepteý kúsheıtildi. Máselen, rastalǵan kirister tizbesi 18-den 12 ólshemshartqa deıin qysqartyldy. Ótken jyly borysh júktemesi normatıvin esepteý mıkrokredıt somasyna qaramastan jeke tulǵalardyń barlyq mıkrokredıtteri boıynsha belgilendi. Al buryn az somaǵa mıkrokredıtter bergen kezde borysh júktemesi koeffıtsıenti eseptelmeıtin edi», - deıdi ol.

Odan bólek, tutynýshylyq kredıt berýde bankter men mıkroqarjy uıymdardyń qyzmetin retteý sharalary qatańdatylǵany aıtyldy.

«Máselen, bankterge 2 mln teńdegen astam iri tutynýshylyq kredıt berýdi shekteý úshin ótken jyly qazanda táýekel-saralaý koeffıtsıentteri 150%-dan 350%-ǵa deıin kóterildi. Sonymen qatar mıkroqarjy uıymynyń menshikti kapıtalynyń jetkiliktilik koeffıtsıentin esepteý kezinde kepilsiz onlaın mıkrokredıt berý naryǵyn báseńdetý maqsatynda tutynýshylyq mıkrokredıtterdi saralaý 5 ese ulǵaıdy», - dedi M. Ábilqasymova.

Onyń málimetinshe, 2021 jyldan bastap elimizde problemalyq bereshekti sotqa deıingi retteýdiń biryńǵaı tártibi engizildi.

«Mıkroqarjy uıymdary beretin problemalyq tutynýshylyq mıkrokredıtterdiń deńgeıin azaıtý úshin ótken jylǵy jeltoqsanda 90 kúnnen astam merzimi ótken mıkrokredıtterdiń úlesi boıynsha 20%-dan aspaıtyn deńgeıde lımıt qoıyldy. Lımıtten asyp ketý menshikti kapıtaldyń jetkiliktiligi normatıvin saqtamaý bolyp tabylady jáne saldarynan mıkroqarjylyq qyzmetke berilgen lıtsenzııa qaıtaryp alynady», - deıdi agenttik tóraǵasy.

Buǵan deıin M. Ábilqasymova shaǵyn nesıe alǵan 657 myń qazaqstandyq tólemdi 3 aıdan astam ýaqytqa keshiktirip júrgenin aıtqan edi.