«Halyqtyń kóshi-qony» týraly jańa zań kóshi-qon salasyna serpin ákeledi - dóńgelek ústel
ALMATY. 6 qyrkúıek. QazAqparat /Erbol Azanbek/ - Jaqynda qabyldanǵan «Halyqtyń kóshi-qony» týraly zań kóshi-qon salasyndaǵy birqatar kemshilikterdi joıady. Bul týraly búgin Almatyda ótken «Etnıkalyq kóshi-qon: Quryltaı sheshimderi jáne jańa zań» atty dóńgelek ústel májilisi barysynda aıtyldy.
Zańger Roza Ómirtaıdyń aıtýynsha, atalǵan zańda buǵan deıin anyqtalmaǵan máseleler anyqtalyp berilgen. «Máselen, Qazaqstan azamattyǵyn almaǵan qandastarymyz etnıkalyq qazaqtar, al, azamattyǵyn rásimdeý ústindegiler oralman, azamattyq alǵan kezden bastap Qazaqstan azamaty sanalady. Oralmandar kvotamen kelgender jáne kvotasyz kelgender degen sanatqa bólingen. Sondaı-aq oralman mártebesin alý merizimi de bekitilgen. Qaı turǵydan alsaq ta zańda birqatar alǵa jyljý bar»,- dedi zańger.
Otyrys barysynda atalǵan zańmen qatar basqa da zańdar sóz boldy. «Buryn «Azamattyq alý týraly» zań bolatyn. Keıin sol zańǵa ózgeris engizilgen kezde «Etnıkalyq qazaqtarǵa jeńildik jasaý» degen bap alynyp tastaldy. Sol bap ornyna keltirilýi kerek», - dedi QR Dúnıejúzi qazaqtary qaýymdastyǵy tóraǵasynyń birinshi orynbasary Talǵat Mamashev.
Otyrys barysynda Dúnıejúzi qazaqtarynyń IV quryltaıynda Elbasynyń sheteldegi qazaqtarmen baılanys jasaý jáne olardyń atajurtqa oralýyn qamtamasyz etý týraly tapsyrmasyn júzege asyrý máselesi de talqylandy. Májiliske QR ІІM, QR Syrtqy ister jáne QR Bilim mınıstrliginiń ókilderi, Qazaqstan, Qyrǵyzstan, Ózbekstandaǵy qazaq ortalyqtarynyń jetekshileri qatysty.
