«Halyqtyń kóshi-qony týraly» zań jobasynda etnıkalyq kóship-qonýshylardyń tarıhı otanyna kirigý jaǵdaıyn jaqsartýǵa baǵyttalǵan normalar qamtylyp otyr

Búgin QR Parlamenti Májilisiniń jalpy otyrysynda «Halyqtyń kóshi-qony týraly» zań jobasy boıynsha baıandaǵan Eńbek jáne halyqty áleýmettik qorǵaý mınıstri Gúlshara Ábdqalyqova osylaı málim etti.

«Zań jobasynda etnıkalyq kóshi-qonǵa qatysty búgingi kúni júrgizilip kele jatqan saıasattyń ıdeologııasy tutasymen saqtalyp, sondaı-aq etnıkalyq kóship-qonýshylardyń tarıhı otanyna kirigý jaǵdaıyn jaqsartýǵa baǵyttalyp otyr. Dálirek aıtqanda, etnıkalyq qazaqtar kóship kelý týraly kvotaǵa qosý týraly aryzymen óziniń turyp jatqan elinde ótinish jasaı alatyndyǵy, kvotaǵa qosýǵa kelisim alǵan jaǵdaıda olar kelgennen keıin 5 jumys kúni ishinde «oralman» mártebesin alatyndyǵy qarastyryldy. Al 10 jumys kúni ishinde turaqty turýǵa ruqsat berilip, bir aı ishinde áleýmettik qyzmetter paketin alatyn bolady», - deıdi mınıstr G. Ábdiqalyqova.

Onyń aıtýynsha, oralman otbasyn kvotaǵa engizgennen keıin kúntizbelik bir jyl ishinde kelgen basqa da otbasy músheleri, sondaı-aq ata-analary, Qazaqstan Respýblıkasynyń azamattyǵyn alǵanǵa deıin týylǵan balalary sol oralmandardyń kóship kelý kvotasyna kire alady. Oralman kvotaǵa qosylǵannan keıin qaıtys bolǵan jaǵdaıda birjolǵy járdemaqy jáne turǵyn úı alýǵa qaralǵan qarajaty onyń Qazaqstan Respýblıkasy azamattyǵyn alyp úlgermegenine qaramastan, otbasy múshelerine beriledi. «Ornalastyrý óńirine qaraı saralanǵan birjolǵy járdemaqy beriletin bolady. Oralmannyń turǵyn úı salýy, qalpyna keltirýi nemese satyp alýy úshin jeńildetilgen nesıe qarastyrylady. Sonymen qatar, zań jobasynda jekelegen adamdar tarapynan jemqorlyq áreketin jasaýyna alǵyshart bolatyn birqatar normalar alynyp tastaldy. Atap aıtqanda, oralmandardyń kóship kelý týraly ótinishti senimdi adam arqyly berý normasy joıylady, kvotaǵa engizilgen oralmandarǵa aqshalaı qarajat Qazaqstan Respýblıkasy azamatynyń jeke basynyń kýálandyratyn qujaty bolǵan jaǵdaıda tólenedi», - deıdi mınıstr. Sonymen qatar, zań jobasynda kvota alǵan kezde qonystanýǵa jiberilgen óńirden basqa jerge alǵashqy úsh jyl ishinde óz betinshe qonys aýdarǵan jaǵdaıda oralman mártebesin alǵan kúnnen bastap 5 jyl ishinde Qazaqstannan tys jerde turaqty oryn aýystyrǵan jaǵdaılarda, tólengen tólemder qaıtarylatyn bolady.