Halyqtyń koronavırýsty qaıdan juqtyrǵanyn anyqtaıtyn epıdemıolog-mamandar tapshy
«Búgingi tańda Qazaqstannyń densaýlyq saqtaý salasynda 250 myńǵa jýyq medıtsınalyq qyzmetker bar. Onyń 72 myńy - dáriger bolsa, 177 myńy - orta medıtsınalyq personaldaǵy mamandar. Barlyq medıtsınalyq uıymdaǵy epıdemıologtar sany – 8 755. Sanıtarlyq-epıdemologııalyq profılde de 2500-ge jýyq maman bar», - dedi Aıjan Esmaǵambetova OKQ-da onlaın rejımde ótken baspasóz máslıhatynda.
Qazaqstannyń bas memlekettik sanıtar dárigeriniń aıtýynsha, densaýlyq saqtaý salasynda Qazaqstanda 4 myńǵa jýyq dáriger jetispeıdi.
«Eger naqty koronavırýsqa qatysty jaǵdaıdy baıan etsek, búgingi kúni koronavırýspen aýyrǵandardy emdeýge 16 myń medıtsınalyq qyzmetker jumyldyrylǵan. Odan bólek, ár aýmaqta 1-20 paıyzǵa deıin kadrlyq rezerv jasaqtalǵan. Bul baǵytta medıtsınalyq qyzmetkerlerdiń jetispeýshiligi joqtyǵyn habarlaǵym keledi. Dese de, epıdemıologtar áli de tapshy. Naqtyraq aıtqanda, koronavırýs ınfektsııasyn adamdardyń qaıdan juqtyryp alǵanyn anyqtaıtyn epıdemıolog-mamandar jetispeı jatyr. Bul rette 800 mamannyń defıtsıti baryn aıtýǵa bolady», - dedi ol.