Halyqtyń kópshiligi adam quqyqtaryn qorǵaý jónindegi uıymdardy bile bermeıdi - «Medıa-Ortalyq» basshysy

ASTANA. Qarashanyń 25-i. QazAqparat /Qanat Mámetqazyuly/ - Qazaqstandyq qoǵam arasynda halyqtyń kópshiliginiń adam quqyqtaryn qorǵaý jónindegi halyqaralyq uıymdardy bilý deńgeıi tómen. Búgin elordada  «Qazaqstandyq ádil sot júıesindegi halyqaralyq normalardyń qoldaný aıasynda tájirıbe almasý» taqyrybynda ótken semınar barysynda «Medıa-Ortalyq» Qoǵamdyq qorynyń dırektory Dıana Okremova  osylaı málim etti,

 dep habarlaıdy QazAqparat.

Qoǵamdyq qor jetekshisiniń aıtýynsha, jurtshylyq arasynda adam quqy salasyndaǵy halyqaralyq normalardy bilý deńgeıin aıqyndaý maqsatynda arnaıy áleýmettik zertteý júrgizilgen. Bul zertteý elimizdiń 7 óńirin qamtyp, oǵan 700-den astam adam qatysqan. Jalpy zertteý qorytyndysyna sáıkes saýalnamaǵa qatysqandardyń basym bóliginiń elimizdegi adam quqyqtaryn qorǵaý jónindegi halyqaralyq uıymdardy bilý deńgeıi óte tómen bolyp shyqqan.

«Sonymen birge, suralǵandardyń 53 paıyzy qazaqstandyq zańnamalardyń halyqaralyq standarttarǵa ishinara ǵana sáıkes dep jaýap berse, 13 paıyzy adam quqyqtary jóninde halyqaralyq standarttarǵa tolyq sáıkes keledi, 19 paıyzy múldem sáıkes emes, dep jaýap bergen. Zertteý nátıjesi qazaqstandyqtardyń kópshiligi ózderiniń quqy taptalǵan jaǵdaıda qandaı halyqaralyq ınstantsııalarǵa júginýge bolatyndyǵyn bilmeıtindigin kórsetti. Máselen, suralǵandardyń 33 paıyzy Eýropalyq Strasbýrg soty dep kórsetse, taǵy bir 33 paıyzy Qazaqstanǵa, tipti adam quqy salasyna qatysy joq uıymdardy ataǵan. Ondaı uıymdardyń bar-joǵy da belgisiz», dedi D. Okremova.