Halyqtyń qolma-qol aqshasyz operatsııalary ulǵaıyp keledi

NUR-SULTAN. QazAqparat – Elimizde onlaın tólemderdiń úlesi 83 paıyzdan asty. Bul týraly Úkimettiń keńeıtilgen otyrysynda Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Tólem júıesi qarqyndy damyp keledi. Bıylǵy 5 aıda halyqtyń qolma-qol aqshasyz operatsııalary ótken jyldyń uqsas kezeńimen salystyrǵanda 35,6 trln teńgege deıin 51 paıyzǵa ósti. Onlaın tólemderdiń úlesi 83 paıyzdan asty», - dedi Ulttyq bank tóraǵasy

Ǵalymjan Pirmatovtyń atap ótýinshe, Ulttyq tólem júıesiniń quramdas bólikteri engizildi. Onyń aıasynda lezdik tólemder júıesin jáne tólem kartochkalarynyń bankaralyq júıesin qurý jumysy júrgizildi. Lezdik tólemder júıesi boıynsha 9 bank júıege qatysý týraly shart jasasty. Onyń 4-eýi óz klıentteri úshin lezdik tólemder júıesi servısterine kirý ruqsatyn ashty. Qalǵan bankter bıylǵy qazanǵa deıin birtindep qosylady.

«Qazirgi ýaqytta kartochkalyq tólemderdi qabyldaý boıynsha qyzmet kórsetetin barlyq bankter Tólem kartochkalarynyń bankaralyq júıesine qosyldy jáne olardyń trafıgin Tólem kartochkalarynyń bankaralyq júıesine aýdarý qamtamasyz etildi. Aldaǵy ýaqytta osy servısterdi aýqymdy etý, qarjylyq qyzmetterdiń ashyqtyǵy men qoljetimdiligin qamtamasyz etý úshin Open API jáne Open Banking damytý tujyrymdamasyn ázirleý, qarjy uıymdarynyń onlaın qyzmetteriniń qaýipsizdigi úshin bıometrııalyq sáıkestendirý boıynsha servısti keńeıtýdi josparlaýdamyz», - dedi ol.