Halyqtyń qalaǵa kóshýin toqtatpasaq, aýyldy jóndegennen ne paıda – senator
NUR-SULTAN. QazAqparat – Senattyń jalpy otyrysynda depýtat Muhtar Jumaǵazıev «Aýyl – el besigi» jobasynyń júzege asyrylý barysyndaǵy kemshilikterdi atady. Onyń paıymynsha, halyqtyń qalaǵa aǵylýyn toqtatý úshin de aýyldy kórkeıtý kerek, dep habarlaıdy QazAqparat tilshisi.
«Agrarlyq sektordy damytýǵa keıingi bes jylda 1,2 trln teńge bólinip, 2014 jylmen salystyrǵanda 2,2 ese ósken. Osy jyldary sýbsıdııa kólemi de 152 mlrd teńgeden 324 mlrd teńgege, óndirilgen ónim kólemi 1,7 ese ósti. Árıne keıingi jyldary shyǵyndardy ákimshilendirýdi jetildirýde birshama jumys atqarylǵanymen memlekettik resýrsty tıimdi paıdalanýda kemshilikter saqtalýda. Máselen jergilikti organdardyń sapasyz josparynyń saldarynan 2019 jyl men aldyńǵy jyldary qordalanǵan sharýalarǵa tıesili 37 mlrd teńgege jýyq mal sharýashylyǵyna arnalǵan sýbsıdııa qaryzdary paıda bolǵan. Osyǵan baılanysty Parlament depýtattarynyń aralasýymen aýyl sharýashylyǵy taýaryn óndirýshilerdiń qaryzy tolyǵymen óteldi», - dedi Muhtar Jumaǵazıev Parlament Senatynyń otyrysynda.
Senatordyń aıtýyna qaraǵanda «Aýyl el – besigi» jobasynyń maqsaty - aýyldyń ınfraqurylymyn damytý, eldi mekendegi sý men jol, densaýlyq saqtaý men bilim berý salalaryna qatysty problemalardy sheshý, aýyldyń áleýetin arttyrý.
«2019 jyly 30 mlrd teńgege 53 aýyldyń ınfraqurylymy jóndele bastady. Bul mańyzdy joba. Sebebi elimizdiń baı agrarlyq áleýetin paıdalana otyryp, halqymyzdy organıkalyq ónimdermen qamtamasyz etý – tek aýyl turǵyndarynyń qolynan keledi. Tótenshe jaǵdaıdyń ózinde kóktemgi egis jumystaryn atqaryp shyqqany osyǵan dálel. Jalǵan ýrbanızatsııaǵa erip, aýyl adamdaryna qalaǵa kóshý protsesterin toqtatý úshin bul jobanyń sapaly iske asýy mańyzdy dep esepteımin», - dedi ol.
Muhtar Jumaǵazıev atalmysh jobany júzege asyrý barysynda áli de salǵyrttyq, bıýrokratızm basym ekenin jetkizdi.
«Birinshiden «Aýyl el – besigi» jobasynda barlyq qajetti sala qamtylmaǵan. Jumystar naqtylanbaǵan. Arnaıy joba dep atalǵanymen bir arnaǵa baǵyttalǵan, bir maqsatqa túıistirilgen joba joq. 2025 jylǵa deıingi óńirlerdi damytýdyń memlekettik baǵdarlamasynyń ishine bir bólik bolyp kirip ketken. Ekinshiden jobanyń ákimshisi retindegi Ulttyq ekonomıka mınıstrligi bıýdjetten bólingen 30 mlrd teńgege ǵana baqylaý júrgizedi. Al aýyl-aımaqtardy damytýǵa baǵyttalǵan «Nurly jol», «Nurly jer», «Jumyspen qamtýdyń jol kartasy» baǵdarlamalarynda qamtylǵan sharalarmen úılesim joq», - dedi ol.
Onyń sózinshe aýyldyń jolyn jóndep, mektebi men aýrýhanasyn rettep, sý men gaz berip, árlep-syrlaǵanymen jumys oryndary bolmasa halyqty, jastardy aýylda turaqtandyrý múmkin emes.
«Aýyl turǵyndary qalaǵa kóshýin toqtatpasa aýyldy jóndegennen ne paıda? Qazagro holdınginiń aqparatyna súıensek, «Aýyl – el besigi» jobasy aıasynda iske asyrylatyn 2451 jobanyń basym kópshiligi 400 myń men 2 mln teńge aralyǵyndaǵy usaq-túıek jobalar. Al tirek aýyldardy damytýǵa múmkindik beretin, halyqty jumyspen qamtıtyn, jaqyn jatqan kishigirim aýyldardyń damýyn arqalaı alatyn irgeli jobalardyń sany nebári 24», - dedi ol.
Senator atalmysh baǵdarlamany júzege asyrýda Úkimetten osy máselege baılanysty naqty sharalardy qabyldaýdy surady.
