Halyqtyń ınvestıtsııalyq saýatyn artyrýǵa arnalǵan telebaǵdarlamalar sany artady
ALMATY. Naýryzdyń 19-y. QazAqparat /Erbol Azanbek/ - Almaty óńirlik qarjy ortalyǵynyń qyzmetin retteý agenttigi «2007-2011 jj. QR halqynyń ınvestıtsııalyq mádenıeti men qarjylyq saýattylyǵyn kóterý» baǵdarlamasy sheńberinde telehabarlar sanyn arttyrady,
dep habarlaıdy QazAqparat Qazaqstan baspasóz klýbyna silteme jasap.
Sondaı-aq buǵan deıin kórsetilip kelgen baǵdarlamalar da jalǵasatyn bolady. Máselen «Habar» arnasynda shyǵatyn "Sizdiń sheshimińiz" («Vash vyhod») áleýmettik-qarjylyq tok-shoýy kesheden beri jańa nusqada kórsetile bastady. Atalǵan baǵdarlama 2009 jyldyń mamyr aıynan bastap kógildir ekranǵa jol tartqan bolatyn. Baǵdarlama qarjy salasynda túrli jaǵdaılarǵa tap bolǵan qazaqstandyqtarǵa kómektesý, tyǵyryqtan shyǵýdyń joldaryn, sheshimderin izdestirý jáne qajetti kásibı aqparattardy usyný maqsatynda QR Almaty qalasy óńirlik qarjy ortalyǵynyń qyzmetin retteý agenttiginiń (AÓQO QRA) 2007-2011 jj. QR halqynyń ınvestıtsııalyq mádenıeti men qarjylyq saýattylyǵyn kóterý baǵdarlamasy sheńberinde shyǵarylyp kelgen edi. Baǵdarlama naryqtyń barlyq qarjylyq sektorlaryna: banktik, zeınetaqylyq, saqtandyrý, sondaı-aq, qundy qaǵazdar naryǵyna qatysty keń aýqymdy máselelerdi qozǵaıdy. Tok-shoýǵa shynaıy oqıǵany bastan ótkergen keıipkerler, sarapshylar, taldaýshylar jáne psıhologtar qatysady. 2009 jyly «Zeınetaqy jınaqtary», «Daǵdarys kezindegi alaıaqtyq», «Avtosaqtandyrý», «Tutynýshylyq nesıeler», «Islamdyq qarjylandyrýlar», «Banktik kartochkalar», «Memlekettik qyzmetkerlerge arnalǵan qundy qaǵazdar», «Otbasylyq bıýdjet», «Aktsııalar jáne halyq», «Banktik júıege senim», «Ómirdi saqtandyrý» taqyryptarymen 30 habar jaryq kórgen. Jańa maýsymda qarjylyq quraldar men qyzmetterge, jeke qarjy men ınvestıtsııany basqarýǵa qatysty, qarapaıym halyqty tolǵandyratyn eń qyzyqty taqyryptar josparlanǵan. Jańa maýsymda kórermen aýdıtorııasyn kóbirek qamtý maqsatynda baǵdarlamanyń efırdegi ýaqyty ózgertildi. Endigi jerde «Vash vyhod» tok-shoýy «Habar» telearnasynda apta saıyn beısenbi kúni saǵat 19:30-da kórsetilip, jeksenbi kúni saǵat 14:40-ta qaıtalanatyn bolady. Tok-shoý orys tilinde, júgirtpe jolda memlekettik tildegi aýdarmasymen kórsetiledi.
AÓQO QRA ókilderiniń aıtýynsha turǵyndardyń ınvestıtsııalyq saýatyn kóterý baǵytynda «Ekonomıka búgin» baǵdarlamasynda orys-qazaq tilderinde «Bizben birge ınvestıtsııala» atty 5 mınýttyq jańa aıdar kórsetile bastady. Sonymen qatar naýryzdyń 24-nen bastap «Habar» arnasyndaǵy «Bıznes meken» baǵdarlamasy aıasynda 5 mınýttyq jańa oqytý aıdary iske qosylmaq.
