Halyqtyń densaýlyǵyn qorǵaý salasynda ÚEU-ǵa 2012 jylǵa arnalǵan úzdik áleýmettik bastamalar baıqaýynyń qorytyndysy shyǵaryldy

ASTANA. 7 qańtar. qazAqparat - Qazaqstan Respýblıkasy Densaýlyq saqtaý mınıstrligi janyndaǵy Patsıentterdiń quqyqtaryn qorǵaý jónindegi qoǵamdyq keńes halyqtyń densaýlyǵyn qorǵaý salasynda úkimettik emes uıymdarǵa 2012 jylǵa arnalǵan úzdik áleýmettik bastamalar baıqaýynyń qorytyndysyn shyǵardy, dep habarlady QR Densaýlyq saqtaý mınıstrliginiń baspasóz qyzmeti.  

Memlekettik áleýmettik tapsyrys sheńberindegi taqyryptardy anyqtaýǵa baǵyttalǵan baıqaýdy QR Densaýlyq saqtaý mınıstrligi 2011 jyldyń jeltoqsan aıynyń basynda jarııalaǵan edi. Shara maqsaty - qoǵamdyq densaýlyqty nyǵaıtý salasynda birqatar mindetterdi birlesip sheshý úshin úkimettik emes uıymdardy tartý boldy.   

Baıqaý ótkizilgen ýaqytta 24 úkimettik emes uıymnan 38 ıdeıa kelip tústi. Qazaqstan Respýblıkasy Densaýlyq saqtaý mınıstrligi janyndaǵy Patsıentterdiń quqyqtaryn qorǵaý jónindegi qoǵamdyq keńes músheleriniń daýys berýi nátıjesinde 11 joba eń kóp daýysqa ıe boldy. Olardyń qatarynda: «2012 jyly kórsetiletin medıtsınalyq qyzmetter jáne dárimen qamtamasyz etý sapasyna halyqtyń shaǵymdanýynyń sebepterin zertteý jáne aldyn alý», «Turǵyndar arasynda organdar jáne tinder donorlyǵyn nasıhattaý jáne Qazaqstan Respýblıkasynda transplantologııany damytý», «Qazaqstanda temekishegýshiliktiń keńinen taralýynyń aldyn alýǵa baǵyttalǵan tıimdi sharalar engizý», «Mı ınsýlti regıstrin qurý» jáne basqa da jobalar bar.         

Patsıentterdiń quqyqtaryn qorǵaý jónindegi qoǵamdyq keńes QR Densaýlyq saqtaý mınıstrligine aǵymdaǵy jylǵy eleýli jobalardyń taqyryptaryn qalyptastyrý barysynda atalǵan bastamalardy esepke alýǵa usynys jasady.

Aıta ketetin jaıt, QR Densaýlyq saqtaý mınıstrligi 2011 jyly alǵash ret túrli úkimettik emes uıymdar arasynda 141 mln. teńge kóleminde memlekettik áleýmettik tapsyrys ornalastyrdy.