Halyqtyń dári-dármekke qaltasy qaǵylmaıdy - densaýlyq saqtaý mınıstri Birtanov
«Qazirgi kezde halyq dári-dármekterdiń basym bóligin jeke menshik dárihanalardan satyp alyp otyrady. Ony bárimiz jaqsy bilemiz. Degenmen, dál osy naryqtyń baǵalary rettelmeıdi. Bizge oǵan kirip, naqty bir erejelerdi ornatý úshin tıisti zańnamaǵa ózgeris engizý kerek. Atap aıtqanda, Halyqtyń densaýlyǵyn qorǵaý týraly kodekste Úkimetke, sonyń ishinde densaýlyq saqtaý mınıstrligine naqty bir quziret engizý kerek. Alaıda osy máseleni aldymen naryq oıynshylary - kásipkerlermen talqylaý qajet. Tamyz aıynda biz tıisti zań jobasyn ázirlep, Úkimettiń qaraýyna engizýdi josparlap otyrmyz», - dedi Birtanov búgin Astanada ótken baspasóz máslıhatynda.
Mınıstrdiń aıtýynsha, memleket atalǵan salany rettep otyrmaǵannan keıin qazaqstandyqtardyń qaltasy qaǵylyp otyr.
«Ashyǵyn aıtý qajet, halyq tym qymbat dári-dármekterdi satyp alýǵa májbúr. Qazirgi kezde biz osy saladaǵy halyqaralyq tájirıbeni zerdelep jatyrmyz. Keshe de kezdestik, búgin de arnaıy jumys tobymen kezdesemiz. Olardyń ishinde halyqarlyq sarapshylar da bar. Qazaqstanda da sheteldik júıeni engizetin bolamyz», - dep atap kórsetti densaýlyq saqtaý mınıstri.