Halyqtyń birliginiń arqasynda bul synaqtan da súrinbeı ótip jatyrmyz - Ómirzaq Shókeev

TÚRKІSTAN. QazAqparat - Túrkistan oblysynda koronavırýs indetin juǵý qarqynyn aýyzdyqtap, taralýyn toqtatý jáne naýqastardy emdeýde qarqyndy jumys atqarylyp jatyr. Búgin oblys ákimi Ómirzaq Shókeev halyq aldynda bergen jyldyq esebinde álemdi sharlaǵan qaýipti indetpen kúres jumystaryna toqtaldy, dep habarlaıdy QazAqparat tilshisi.

Óńir basshysy pandemııaǵa baılanysty búkil álem óte kúrdeli ahýaldy bastan ótkerýine qaramastan, ońtústikte indettiń aldyn alý boıynsha júıeli jumystar atqarylyp jatqanyn jetkizdi.

«Birlese kótergen júk jeńil» degendeı, halyqtyń bereke-birliginiń arqasynda bul synaqtardan da súrinbeı ótýdemiz. Óńirde indettiń taralýyn toqtatý jáne naýqastardy emdeý isinde edáýir jumystar atqaryldy. Dárigerlerimiz osy indetpen kúrestiń aldyńǵy shebinde júr. Álemdik pandemııa-koronavırýs indeti ekonomıkanyń birqatar negizgi salalaryn tejegendigi belgili. Úkimetpen der kezinde qabyldanǵan antıkrızıstik sharalar, kásipkerlikke, otandyq taýaróndirýshilerge jan-jaqty qoldaý kórsetý arqasynda ekonomıkanyń negizgi salalary boıynsha ósim deńgeıin saqtap qalý múmkin boldy»,-dedi Ómirzaq Shókeev.

Oblystaǵy medıtsınalyq uıymdardyń materıaldyq-tehnıkalyq bazasy birneshe baǵyttar boıynsha jasaqtalǵan.

Pandemııa bastalǵaly ókpeni jasandy jeldetý apparattarynyń sany artyp, qosymsha tórt ottegi stantsııasy ornatylǵan.

Ottegi kontsentratorlary men ottegi núkteleriniń sany artty. Oblystyq bıýdjet esebinen kompıýterlik tomograf pen úsh dana sandyq rentgen apparattary ornatylǵan.

Óńirde dári-dármek pen medıtsınalyq buıymdardyń eki aılyq qory qurylǵan.

Úkimet tarapynan 12 birlik jyljymaly medıtsınalyq keshen jıyntyǵy alynyp, aýyldyq jerlerde medıtsınalyq kómektiń qoljetimdiligin qamtamasyz etý kórsetkishi 100% quraǵan.

Jedel járdem qyzmeti 122 avtokólikpen qamtamasyz etilip, bul avtokólikter jedel-járdem qyzmeti parkin tolyq jańartýǵa múmkindik bergen.

Túrkistan oblysy COVID-19 kórsetkishi boıynsha elimizde 17-shi orynda, ıaǵnı «jasyl aımaqta» ornalasqan.

«Byltyrdan bastap óńirde densaýlyq saqtaý salasynda 78,5 mlrd teńgeniń 7 nysany salynýda. Túrkistan qalasynda jańa úlgidegi 200 oryndyq jańa úlgidegi kópsalaly medıtsınalyq ortalyq paıdalanýǵa berildi. Budan bólek, Birikken Arab Ámirlikteriniń ınvestorlarymen Túrkistan qalasynda 100 tósek orynǵa arnalǵan «Ana men bala ortalyǵynyń» qurylysyn iske asyrý boıynsha kelissózder júrgizilip, oń nátıjesin tapty. Joba keler jyly paıdalanýǵa beriledi»,-dedi oblys ákimi.

Ótken jyly densaýlyq saqtaý salasyna 13,7 mlrd teńge baǵyttalǵan.

Birinshi kezekte ana men bala, jansaqtaý, ota jasaý jáne jedel járdem qyzmetin kúsheıtýge maqsat qoıylǵan.

Medıtsınalyq uıymdardyń materıaldyq-tehnıkalyq bazasyn jabdyqtaý maqsatynda 2,5 mlrd teńgege 205 dana medıtsınalyq tehnıka satyp alynǵan.

Memlekettik-jekemenshik áriptestik tetigi arqyly 9 feldsherlik ambýlatorııanyń qurylystary júrgizilip, onyń 5-i paıdalanýǵa berilgen.

Onyń tórteýi bıyl ashylady dep josparlanyp otyr.