Halyqtyń az qorǵalǵan toptaryna ataýly áleýmettik kómek arqyly qoldaý kerek - Prezıdent

ASTANA. QazAqparat - Búgin Aqordada ótip jatqan QR Úkimetiniń keńeıtilgen otyrysynda Memleket basshysy Nursultan Nazarbaev azyq-túlik taýarlarynyń baǵasyna qatysty monıtorıng jumystaryn jandandyrýdy tapsyrdy.

«Áleýmettik mańyzy bar kóptegen taýar túrleri boıynsha baǵanyń ósýin baıqap otyrmyz. Osyǵan baılanysty Úkimet pen ákimder birinshi qajettiliktegi taýarlardyń baǵalary boıynsha monıtorıng jumystaryn jandandyrýy kerek, ásirese azyq-túlik taýarlaryna qatysty. Qajet bolǵan jaǵdaıda halyqtyń az qorǵalǵan toptaryna ataýly áleýmettik kómek arqyly qoldaýdy qamtamasyz etý kerek»,-dedi Prezıdent.

«Qazaqstanda óndirilgen ónimderge baǵany kóterýge qandaı negiz bar? Birneshe jyldan beri azyq-túliktiń ımportyn qysqartý jaıynda aıtyp kelemiz. Sen maǵan aıttyń ǵoı «80 paıyzǵa (otandyq azyq-túlikpen) qamtamasyz etip otyrmyz» dep. Osy 80 paıyz dúken sórelerinde bolý kerek, ıaǵnı baǵany ósirýge negiz joq qoı»,-dedi Elbasy QR Aýyl sharýashylyǵy mınıstri Asyljan Mamytbekovke qaratyp aıtqan sózinde.

Osy oraıda Memleket basshysy bul baǵytta eleýli jumystar atqarylǵanyn, aýyl sharýashylyǵyna qomaqty qarjy jumsalǵanyn atap ótti.