Halyqtyń ashýyn túsinýge bolady - Qasym-Jomart Toqaev
ULYTAÝ. QazAqparat – Ulttyq quryltaıdyń alǵashqy otyrysynda sóılegen sózinde QR Prezıdenti Qasym-Jomart Toqaev jemqorlyqtyń zardabyna toqtaldy, dep habarlaıdy QazAqparat tilshisi
«Biz sybaılas jemqorlyqqa qarsy belsendi kúres júrgizip jatyrmyz. Bul – elimiz úshin óte ózekti, qajetti másele. Qazaqstan jemqorlyqpen kúrestiń negizgi kórsetkishteri boıynsha aıtarlyqtaı alǵa basty. Halyqaralyq reıtıng agenttikteri osylaı dep baǵalap otyr», - dedi Memleket basshysy.
Prezıdenttiń paıymynsha, munymen toqmeıilsip otyrýǵa bolmaıdy.
«Ókinishke qaraı, jemqorlyq – jurttyń sanasyna sińip, ábden ádetke aınalyp ketken. Bul – aşy bolsa da, shyndyq.
Azamattarymyz saıası qoldaýǵa ıe bolǵan keıbir adamdardyń shekten tys baıyp ketetinine narazy. Oǵan qosa, olar baılyqtarynyń qomaqty bóligin shetel asyryp áketken. Halyqtyń ashýyn túsinýge bolady.
Sondyqtan, meniń Jarlyǵymmen Arnaýly mekemearalyq komıssııa quryldy. Komıssııanyń mindeti – shetelge zańsyz shyǵarylǵan qarjyny elge qaıtarý. Bul – óte kúrdeli jumys, uzaqqa sozylýy múmkin. Sebebi, kóptegen zańdyq protsedýradan ótý kerek. Biraq, biz qalaı bolsa da, bul máselemen muqııat aınalysýymyz qajet. Áıtpese, ádiletti qoǵam týraly sóz qozǵaýdyń ózi qıyn bolady», - dedi Memleket basshysy.
