Halyqtyń áleýmettik hal-ahýaly ındıkatory boıynsha oń dınamıka baıqaldy - "Strategııa" ÁSZO" QQ-nyń prezıdenti
ALMATY. Tamyzdyń 16-sy. QazAqparat /Erbol Turymbetov/ - Sońǵy jylda halyqtyń áleýmettik hal-ahýaly ındıkatory boıynsha oń dınamıka baıqaldy. Ony búgin "Strategııa" áleýmettik jáne saıası zertteýler ortalyǵy" (ÁSZO) qoǵamdyq qorynyń prezıdenti Gúlmıra Eleýova aıtty,
dep habarlaıdy QazAqparat.
Onyń aıtýynsha, shilde aıynda júrgizilgen saýalnama nátıjesinde eldegi jaǵdaıdy "beıqam, tynysh jaǵdaı" dep baǵalaýshylardyń sany 78%-dy quraıdy. Ol byltyrǵy jylmen salystyrǵanda 16%-ǵa ósken. Al respondentterdiń áleýmettik jaǵdaıyn "óte jaqsy/jaqsy" dep baǵalaýshylary 44%-dy qurasa, "ortasha" dep baǵalaýshylardyń sany 52%-dy quraǵan.
"Sońǵy jyly halyqtyń áleýmettik hal-ahýaly ındıkatory boıynsha oń dınamıka baıqaldy. Jalpy, jaǵdaıdyń jaqsarýy qoǵamdyq sanada ómirge degen kóńil tolýshylyq deńgeıiniń joǵarylaýyna sebepker boldy. Bul kórsetkish 3 aı ishinde 14%-ǵa artty. Zertteý nátıjelerine júginer bolsaq, bir jyldan soń "otbasymnyń jaǵdaıy ózgermeıdi" deýshilerdiń úlesi 35% dan 26%-ǵa tómendedi", dedi G. Eleýova. Onyń málimdeýinshe, kelesi jyly «otbasymnyń jaǵdaıy aıtarlyqtaı jaqsarady» jáne «azdap jaqsarady» deýshilerdiń sany sáıkesinshe +7% jáne +4%-ǵa artqan.
