Halyqtyń áleýmettik belsendiligi artyp kele jatyr - O. Muhamedjanov
ANA. 12 mamyr. QazAqparat /Jasulan Amanbaıuly/ - Búgin QR Parlamenti Májilisiniń Tóraǵasy «Nur Otan» HDP fraktsııasynyń jetekshisi Oral Muhamedjanov partııanyń Ortalyq apparatynda azamattardy jeke máseleleri boıynsha qabyldaý ótkizdi.
O. Muhamedjanov ótkizgen qoǵamdyq qabyldaýǵa zeınetkerler, shaǵyn jáne orta bıznes ókilderi, qoǵamdyq uıym ókilderi men stýdentter qatysty.
Olardyń kúrmeýi sheshilmeı jatqan problemalary QR azamattyǵyn alý máselesinen bastap, júıeli sheshimdi talap etetin jalpy respýblıkalyq aýqymdaǵy máselelerdi qamtydy.
«Búgin qabyldaýda bolǵan bir azamatshanyń usynysy turǵyn úı qarym-qatynasyna qatysty zańnamaǵa túzetýler men tolyqtyrýlar engizýge baılanysty boldy. Bul qýantarlyq jaǵdaı. Ol halyqtyń áleýmettik belsendiligi artyp kele jatqandyǵyn bildiredi. Adamdar óziniń tilim nanyn, kúıbeń tirshiligin ǵana emes, qoǵamnyń saýlyǵyn oılaıdy, bizdiń ómirimizdi jaqsartý jolynda belsenip júr»,-deıdi O. Muhamedjanov.
Degenmen halyqtan túsetin eń kóp saýal, Fraktsııa jetekshisiniń aıtýynsha, turǵyn úı, baspana máselesine qatysty bolǵan. «Bul úrdis jyl saıyn qala halqynyń sanynyń ósýimen kúrdelene túsýde»,-deıdi ol.
«Úkimet turǵyn úı baǵdarlamasyn qabyldady. Ol 3 baǵytta damıdy. Sondyqtan aldaǵy 7-10 jylda bul másele tolyq sheshilmese de, onyń burynǵydaı kúrdeliligi tómendeıdi»,-deıdi O. Muhamedjanov.
Qabyldaýǵa kelgen azamattardyń birqatar problemalary ornynda sheshimin tapsa, qalǵandary keıin tıisti quzyretti memlekettik organdarǵa joldandy. Olardyń barysy partııanyń baqylaýynda bolady.
«Eger azamattarymyz shynynda da bir zańsyzdyqqa tirelip tursa, olardyń zańdy túrde sheshilýine qol jetkize almaı jatsa, oǵan biz kirisemiz, belsendi túrde atsalysamyz da, bul máseleni sheshemiz»,-dep atap kórsetti Májilis Tóraǵasy.
Jalpy fraktsııa depýtattary «Nur Otan» HDP-niń Ortalyq apparatynda kestege sáıkes aptasyna eki ret qabyldaý ótkizip otyrady. Jyl basynan beri nurotandyq depýtattar 23 qabyldaý uıymdastyrdy. Onyń barysynda 194 aryz-ótinish qabyldanǵan. Qazirgi tańda 185 is óz sheshimin tapty.
