Halyqtyń áleýmettik álsiz toptaryna advokattar tegin zań kómegin kórsetedi
ASTANA. QazAqparat - Halyqtyń áleýmettik álsiz toptaryna advokattarmen jáne zań konsýltanttarymen tegin zań kómegin kórsetý qarastyrylǵan. Bul týraly Parlament Májilisiniń jalpy otyrysynda «Advokattyq qyzmet jáne zań kómegi týraly» zań jobasyn talqylaý kezinde Ádilet mınıstri Marat Beketaev málim etti, dep habarlaıdy QazAqparat.
«Zań jobasymen halyqtyń áleýmettik álsiz toptaryna advokattarmen jáne zań konsýltanttarymen quqyqtyq jaǵdaıdyń basynan aıaǵyna deıin tegin zań kómegin kórsetý qarastyrylǵan. Ol - pro bono dep atalady. Osyndaı qyzmetterdi kórsetý taraptardyń kelisýimen erikti jáne óteýsiz negizde bolady. Aıta ketý qajet, rro bono qyzmeti mindet emes, ol quqyq bolyp tabylady jáne ony kórsetý májbúrli bolmaıdy», - dep túsindirdi M. Beketaev.
Búgingi tańda sottarda azamattyń múddesin zańdyq bilimi bar kez kelgen adam bildire alady. Alaıda osyndaı kómek sapasyz kórsetilgen jaǵdaıda azamattar óz quqyqtaryn qorǵaı almaıdy.
«Osy oraıda sottarda ókildik etetin jeke tulǵalardyń zań konsýltanttary palatalaryna mindetti túrde múshelikte bolýy qarastyrylǵan. Jeke tájirıbemen aınalysatyn zańgerlerdiń ózin-ózi basqarý uıymdaryna múshelikte bolýy zań kómeginiń sapasyn arttyrýǵa negiz bolady», - dedi mınıstr.
Talqylaýdan keıin palata depýtattary zań jobasyndaǵy jańashyldyqtarǵa qoldaý bildirip, «Advokattyq qyzmet jáne zań kómegi týraly» zań jobasyn birinshi oqylymda maquldady.
