Halyqtyń ál-aýqaty aýyl sharýashylyǵynyń damýyna baılanysty - T. Espolov
Bul týraly búgin Almatydaǵy «Ǵylym ordasynda» bastalǵan «Integratsııalyq úrdisterdi damytý jaǵdaıyndaǵy (AÓK) agroónerkásiptik keshen máseleleri» taqyrybynda Halyqaralyq ǵylymı-tájirıbelik konferentsııa barysynda Qazaq ulttyq agrarlyq ýnıversıtetiniń rektory Tilektes Espolov málim etti.
Onyń aıtýynsha, elimizde qazir 6900-den asa aýyldyq eldi mekender bar. Olardy saqtaý, damytý - búgingi kúnniń basty talaby. Ekonomıkany ár taraptandyrý úderisi barysynda aýyldardyń damýy basty rol atqarady.
«Búginde Qazaqstanda 200 myńnan astam aýyl sharýashylyǵy qurylymdary bar. Olardyń 193 myńy sharýa qojalyqtary. Sonymen qatar, 7 myńnan astam aýyldyq kásipkerler bar. Bul az. Al olardyń sanyn kóbeıtý úshin birinshi kezekte nesıe berý máselesin ońtaılandyrýymyz kerek. Óıtkeni aýyl sharýashylyǵy qandaı kezeń bolmasyn kez kelgen memlekettiń ekonomıkasynyń basty salasy bolyp qala beredi» - dedi óz sózinde T. Espolov.
Eki kúnge sozylatyn jıyn barysynda elimizdiń agrarlyq bilim, ǵylym, óndiris salasyndaǵy basqa da ózekti máseleleri: memleketaralyq ıntegratsııa jáne ulttyq agrarlyq azyq-túlik naryǵynyń túıtkilderi; DSU jaǵdaıyndaǵy Qazaqstannyń agroóndiristik kesheniniń tıimdiligi men básekege qabilettiligi; Agrarlyq óndiris sharýashylyǵyndaǵy ıntegratsııa men kooperatsııa; Jer qatynastary problemalary jáne jer naryǵyn damytý; Agroóndiristik keshendi memlekettik qoldaý: qazirgi jaǵdaı men problemalar, agrarlyq ekonomıkanyń áleýmettik qyrlary máseleleri talqylanady.
Konferentsııa jumysyna Qazaqstanmen qatar, Germanııa, Reseı, Belarýs, Ýkraına, Qyrǵyzstan, Ázerbaıjan, Tájikstan elderiniń agrarshy ǵalymdary men fermerleri jáne QR Aýyl sharýashylyǵy mınıstrliginiń ókilderi, «QazAgroInnovatsııa» AQ, osy saladaǵy ǵylymı-zertteý ınstıtýttarynyń ǵalymdary, basqa da bilim berý mekemeleri, memlekettik jáne qoǵamdyq uıymdardyń ókilderi qatysýda.
Aıta ketelik, bul basqosý Qazaq agroónerkásip kesheni ekonomıkasy jáne aýyldyq aýmaqtardy damytý ǵylymı-zertteý ınstıtýtynyń qurylǵanyna 80 jyl tolýyna oraı ótkizilip otyr.