Halyqtyń ádebıetke degen suranysy qaıta artyp keledi-O. Súleımenov
ALMATY. 17 mamyr. QazAqparat /Ádilet Musahaev/ - Halyqtyń ádebıetke degen suranysy qaıta artyp keledi. Bul pikirldi aqyn Oljas Súleımenov búgin Almatydaǵy Ulttyq kitaphanada óziniń 75 jyldyq mereıtoıyna arnalyp ótkizilgen jyr keshinshe aıtty.
«Sońǵy 20 jylda halyqtyń ádebıetke degen suranysy tómendegenimen, qazir qaıta artyp keledi. Men álemdegi ádebıettiń órleýimen qatar eldegi jaǵdaıǵa da baǵdar jasap otyramyn», - deıdi Oljas Omaruly.
Aqyn sondaı-aq elimizde buryn kitapty oqyrmandar izdep júrip oqıtyndyǵyn, uly aqyndar men jazýshylardyń dáýiri bolǵandyǵyn aıtyp ótti. «Túske deıin QazUAÝ-diń stýdetterimen kezdesip, olardyń oqyǵan óleńderinen tolǵanyp, jaqsy áserde shyqtym. Jastardyń óleńimdi áli de súıip oqıtyndyǵyna kýá bolyp, tek gýmanıtarlyq mamandyqtyń emes, agrarly salada bilim alyp jatqan stýdentterdiń de poezııaǵa degen qulshynysyn, talantty jastardy kórip qýanyp shyqtym», - deıdi O.Súleımenov.
Sonymen qatar aqyn búgingi keshti týǵan kúnine syılaǵan úlken syı retinde qabyldaıtyndyǵyn da atap ótti. «Jalpy týǵan kúnimdi tynysh jerde, aq paraq jáne qalammen qarsy alǵandy unatamyn», - deıdi aqyn.
Kesh barysynda Ulyqbek Esdáýlet, Almat Isádil jáne taǵy basqa tanymal aqyndar O.Súleımenovtiń óleńderin oqyp, keshti odan ári qyzdyra tústi.
Ulttyq kitaphanada ótken atalǵan keshti óziniń quttyqtaý sózimen ashqan Murat Áýezov aqynnyń atqarǵan eren eńbekterin ataı kelip, oǵan zor densaýlyq pen uzaq ǵumyr tiledi. "Búgin barlyǵymyzdyń esimizde qalatyn erekshe kún bolaıyn dep tur. Óıtkeni kórnekti aqyn Oljas Súleımenov 75 jasqa tolyp otyr", - dedi ol.
