Halyqtyń abaısyz bolýynan ShQO-da jyl basynan 46 ret órt shyqqan
ÓSKEMEN. QazAqparat – Shyǵys Qazaqstan oblysynda bıyl halyqtyń otty abaısyz paıdalanýynan 46 ret órt shyqqan, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, jyl basynan beri óńir jurtshylyǵynyń otty abaısyz paıdalanýynan 46 ret órt boldy. Osy rette, qutqarýshylar otty qoldanýdaǵy abaısyzdyqtyń saldarynan qyzyl jalynnyń shyǵýyna ákelip soǵatyn negizgi jaǵdaılardy atap ótti:
- Janyp turǵan maıshamnyń qaraýsyz qalýy. Úı janýarlary maıshamdy úrleýi nemese qulatyp ketýi múmkin. Bólmeden shyqqan kezde maıshamdy sóndirip júrińiz. Janyp turǵan maıshamdy tipti 3 mınýtqa da qaraýsyz qaldyrmańyz.
- Temeki shegý kezindegi abaısyzdyq. Bul úılerdiń órtenýine ákelip soǵatyn eń negizgi sebep. Kóbinese mundaı jaǵdaılar azamattardyń ishimdik ishýinen keıin bolady. Mas kúıdegi adam óz áreketterine jaýap bere almaıdy.
- Tabıǵat aıasynda ot jaǵyp, qaraýsyz qaldyrý. Jer úıler men saıajaı turǵyndary dalada káýáp pysyrady, shóp nemese qoqys jaǵady. Sol kezde qarapaıym qaýipsizdik erejeleri saqtalmaıdy. Saldarynan tilsiz jaý úılerge, ǵımarattarǵa, orman alqaptaryna taraıdy.
- Balalardyń otpen oınaýy. Balalar ata-analarynyń qaraýynsyz qalǵanda sirińkemen oınap jatady. Olar mamyq pen shópti órteıdi. Al sonyń kesirinen úlken órtter shyǵyp jatady, - delingen aqparatta.
Osy rette, TJD mamandary oblys turǵyndaryna órt qaýipsizdigi erejelerin qatań saqtaý qajettigin eske saldy.
Buǵan deıin, Shyǵys Qazaqstan oblysy turǵyndarynyń tamaqty peshte umyt qaldyrýynan 20-dan astam ret órt shyqqanyn habarlaǵan edik.
