Halyqtyń 99,3% jyl sońyna deıin keńjolaqty ınternetpen qamtamasyz etiledi

NUR-SULTAN. QazAqparat – Jyl sońyna deıin Qazaqstan halqynyń 99,3% keńjolaqty ınternet qoljetimdi aýmaqta turady. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrligi telekommýnıkatsııalar komıtetiniń tóraǵasy Vıtalıı ıAroshenko málimdedi, dep habarlaıdy QazAqparat.

«Jyl basynda uıaly baılanys operatorlary men bizdiń mınıstrlik arasynda memorandýmǵa qol qoıyldy. Oǵan sáıkes uıaly baılanys operatorlary jobany aıaqtaýǵa jáne 250-den astam adam turatyn barlyq aýyldardy 3G jáne/nemese 4G qyzmetterimen qamtamasyz etýge mindetteldi. Atalǵan joba boıynsha ázirge 46 aýyl qamtyldy, 882 eldimeken jyl sońyna deıin qamtamasyz etiledi», - dedi spıker Ortalyq kommýnıkatsııalar ortalyǵynda ótken baspasóz máslıhatynda.

Onyń aıtýynsha, jyl sońyna qaraı Qazaqstan halqynyń 99,3% keńjolaqty ınternet qoljetimdi aýmaqta turady.

«Odan bólek, 250-den az adam turatyn aýyldardy qaıtemiz degen másele qaraldy. Bizdiń vedomstvo Ulttyq ekonomıka mınıstrligimen jáne ákimdiktermen birlesip taldaý júrgizdi. Qazirgi ýaqytta 243 eldimeken iriktelip alyndy, onda da keńjolaqty Internet jelisi salynady. Jańa oqý jylyna daıyndyq boıynsha da jumys júrgizdik. Internetpen problemasy bar mektepter jáne ınternetpen qamtylmaǵan aýyldardaǵy oqýshylar qalypty rejımde oqıdy», - dedi V. ıAroshenko.