Halyqtyq sport oıyndary: Úzdik óńirler anyqtaldy
ASTANA. QazAqparat - Aqtaýda QR Prezıdentiniń syılyǵy úshin VI Halyqtyq sport oıyndary aıaqtaldy, dep habarlaıdy QazAqparat.
Tórt jylda bir ret uıymdastyrylatyn Halyqtyq jarystar bıyl 21-25 qyrkúıek aralyǵynda ótti. Onda óńirlerden 2,5 myńnan astam sportshy 13 sport túrinen básekege tústi.
Nátıjesinde, jalpykomandalyq esepte birinshi orynǵa Astana quramasy ıe boldy. Ekinshi jáne úshinshi oryndarǵa sáıkesinshe Almaty men Shymkent qalalarynyń ókilderi ornalasty.
Astana quramasynyń sapynda 113 adam óner kórsetti. Júgirýde sporttyq baǵdarlaý komandasy men asyq atýdan erler kósh bastady. Bes tas oıynynda áıelder quramasy ekinshi oryndy ıelense, gir tasyn kóterýden «qola» buıyrdy. Aıta keteıik, elordalyqtar voleıbol, jaǵajaı voleıboly, shaǵyn fýtbol, ústel tennısi jáne qazaq kúresi syndy sport túrlerinen qarsylastaryna ese jiberip aldy.
«Sportshylar elordamyzdyń Qazaqstannyń qarjylyq jáne mádenı ortalyǵy ǵana emes, sondaı-aq sporttyq astana atanýǵa laıyq ekendigin dáleldedi. Bul bárimiz úshin zor maqtanysh», - dedi Astana qalasynyń Mádenıet jáne sport basqarmasynyń basshysy Bolat Majaǵulov.
Eske salaıyq, 2014 jyly QR Prezıdentiniń syılyǵy úshin Halyqtyq sport oıyndary Óskemen qalasynda ótti.
