«Halyqtyq kommýnıster» Astanada Qajymuqanǵa eskertkish ornatýdy usynady
ASTANA. QazAqparat - Astanada Qajymuqanǵa eskertkish ornatylýy kerek. Búgin Májiliste Úkimet basshysynyń atyna saýal joldaǵan «Halyqtyq kommýnıster» partııasy fraktsııasynyń múshesi Tólesh Kenjen osy máseleni kóterdi.
Saýal barysynda depýtat jaqynda ekranǵa shyqqan reseılik «Poddýbnyı» fılmi birqatar TMD elderine, sonyń ishinde Qazaqstanda ár túrli pikirler týǵyzǵanyn atap ótti.
«Men bul salanyń bilgir mamany emespin. Mamandar barlyq máseleniń mán-jaıyn anyqtap jatar. Al bizdiń saýalymyz ataqty balýan jáne qazaq halqynyń batyr uly - Qajymuqan Muńaıtpasulynyń esimin máńgi este qaldyrýǵa baılanysty bolyp otyr. Ult batyry jerlengen Ońtústik Qazaqstandaǵy sportty qadirleıtin azamattardyń balýannyń murajaıyn ashýy maqtaýǵa turarlyq is. Al osy qarasha aıynda Talapker aýyldyq okrýginiń jurtshylyǵy ózi týyp ósken aýylda uly tulǵanyń eskertkishin ornatty. Talapker - Astana tóńiregindegi eldi meken. Bul da atap ótýge turarlyq jaıt. Alaıda, ult maqtanyshyna aınalǵan Qajymuqannyń eskertkishi Astanada nege joq?» - dedi T. Kenjın.
Onyń aıtýynsha, atalǵan shara Qazaq handyǵynyń 550 jyldyǵy qarsańynda, Jeńistiń 70 jyldyǵy qarsańynda mańyzdy másele ekeni sózsiz. Óıtkeni, ult batyry Uly Otan soǵys jyldarynda óz qarajatyna ushaq jasatqany tarıhtan belgili.
