«Halyqtyq ІRO» baǵdarlamasyn iske asyrýǵa arnalǵan zań jobasy birinshi oqylymda maquldandy - Senat
ASTANA. 21 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine qor naryǵyn damytý máseleleri boıynsha ózgerister men tolyqtyrýlar engizý týraly» zań jobasy maquldandy.
Atalǵan zań jobasy «Halyqtyq ІRO» baǵdarlamasyn iske asyrýdyń zańnamalyq bazasyn jasaý úshin ázirlengen. Bul rette qujat boıynsha jeti zańnamalyq aktige, onyń ishinde Ákimshilik quqyq buzýshylyq týraly kodekske, korporatıvtik normalardy belgileıtin jáne baǵaly qaǵazdar rynogyn retteıtin zańdarǵa, sondaı-aq kólik salasy men tabıǵat paıdalaný máselelerin retteıtin zańdarǵa ózgerister men tolyqtyrýlar engizý kózdeledi. Atap aıtqanda, kodekske «Halyqtyq ІRO» baǵdarlamasyna qatysý sheńberinde alynǵan kirister boıynsha salyq eseptegen organǵa salyqty ýaqytyly usynbaǵany úshin aıyppul mólsherin azaıtýdy kózdeıtin ózgerister engiziledi. Budan bólek, qoldanystaǵy zańnamalarǵa «Qazaqstan temir joly» UK» AQ aktsııalaryn jarııa ornalastyrý úshin jáne «QazMunaıGaz» AQ men «Qazatomónerkásip» UAK» AQ aktsııalaryn jarııa ornalastyrý úshin jaǵdaı jasaý bóliginde ózgerister engizý usynylady.
Al «Aktsıonerlik qoǵamdar týraly» zańǵa aktsııalary «Halyqtyq ІRO» baǵdarlamasy sheńberinde ótkiziletin aktsıonerlik qoǵamdarǵa qoıylatyn jekelegen talaptardy alyp tastaý bóliginde, jarııa kompanııalardyń osy qoǵamdardy moıyndaýy úshin ózgerister engiziledi.
Atap óterligi «Halyqtyq ІRO» baǵdarlamasyna qatysatyn emıtentke aktsııalardy osy baǵdarlama sheńberinde sheteldik azamattarǵa nemesae zańdy tulǵalarǵa, sondaı-aq azamattyǵy joq adamdarǵa satýǵa tyıym salynady. Al «Samuryq-Qazyna» qorynyń Dırektorlar keńesine Qor torabyna kiretin uıymdar aktsııalarynyń baǵasy, sany jáne olardy ornalastyrý qurylymy týraly sheshim qabyldaý jóninde zańdy quzyret beretin bolady.
Zań jobasy ekinshi oqylymǵa ázirlenetin bolady.
