Halyqtyq ІRO baǵdarlamasy qor naryǵyn damýdyń sapaly jańa satysyna shyǵarady - Qazaqstan qor bırjasynyń vıtse-prezıdenti
ALMATY. 7 qarasha. QazAqparat - Bul qor naryǵy úshin erekshe este qalatyn kún bolady. Qazaqstan qor bırjasynyń vıtse-prezıdenti Bolat Babenov búgin Almatyda «QazTransOıl» AQ basshylyǵynyń qarjy naryǵynyń qatysýshylarmen jáne jeke ınvestorlarmen bolǵan kezdesýde osylaı aıtty.
«Halyqtyq ІRO baǵdarlamasy aıasynda «QazTranOıl» AQ-nyń qarapaıym aktsııalaryn ornalastyrý aktsııasy Qazaqstan qor naryǵynyń jańa tarıhyn ashady. Búkil álemde qor naryǵy ekonomıkaǵa bos qarjyny tartý tetigi rólin atqarady. Qazirgi naryqtyq ekonomıka onsyz tolyqqandy jumys jasaı almaıdy. Sol sebepti «Halyqtyq ІRO baǵdarlamasyn» júzege asyrý bizge sapaly jańa deńgeıge kóterilýge múmkindik beredi. Naryq sapaly jańa qarjy quraldarymen jáne ınvestorlardyń barlyq kategorııalarymen tolyǵady», - deıdi B. Babenov.
Onyń aıtýynsha, Qazaqstannyń qor naryǵynda qazirgi tańda bizde ınstıtýtsıonaldyq ınvestorlar basymdyqqa ıe. Ol naryqtyq ótimdiligi men ekonomıkadaǵy aqsha aınalymyna óz áserin tıgizýde. Qor bırjasy vıtse-prezıdentiniń sózine qaraǵanda, álemde ІRO baǵdarlamalaryn júzege asyrǵan elder kóp. Olardyń kópshiligi qor naryǵynda damýdyń jańa deńgeıine shyǵýda jaǵymdy ról atqardy. Halyqtyq ІRO baǵdarlamasynyń Qazaqstannyń qor naryǵyna da osyndaı ońdy áseri bolady degen úmit zor. Jalpy qor bırjasynyń bul baǵdarlamany júzege asyrýdaǵy róli jetkilikti deńgeıde joǵary. Oǵan qor bırjasy uzaq ýaqyt boıy ázirlik jasady.
