«Halyqtyq ІRO» aıasynda «Qazposhta» jumysy jaqsarta túsýdi qajet etedi - Q. Qabyldın
ASTANA. 3 sáýir. QazAqparat - «Halyqtyq ІRO» aıasynda «Qazposhta» jumysyn jaqsarta túsý kerek jáne osy maqsatta ony tıisti tehnologııalarmen qaıta jabdyqtandyrý qajet. Bul týraly búgin Parlament Senatynda ótken kezdesý barysynda «QazTransGaz» AQ Bas dırektory Qaıyrgeldi Qabyldın málim etti.
«Elimizdiń bas transfer-agenti «Qazposhta» - asa qarbalas rejımde jumys istedi, sondyqtan da ІRO kezinde keıbir ótinishter uzaq ýaqyt rásimdeldi. Óıtkeni, ol ótinishterdi poshtanyń ortalyq keńsesine joldap, sosyn brokermen qol qoıdyrý qajet edi. Sosyn baryp bul qujatty qaıta qaıtarýǵa úsh-tórt kún ýaqyt ketti», - deıdi Q. Qabyldın. Onyń aıtýynsha, bundaı jaǵdaıda klıentter aktsııalardy satyp alý men satýlarǵa qatysty nusqaýlardyń oryndalý salbyrlyǵyna syn aıtýy múmkin. Sondyqtan da, Bas dırektor «Qazposhtany» qajetti tehnıkalyq jáne tehnologııalyq baǵdarlamamen qamtamasyz etý boıynsha qaıta jaraqtandyrý kerektigin alǵa tartady.
«Onyń ishinde klıentter tarapynan beriletin nusqaý men buıryqtardy brokerge «qolma qol» jetkizetin múmkindikterdi qamtıtyn tehnologııa kerek. Budan bólek, «Qazposhta» personaldaryn oqytý baǵdarlamalaryn da jalǵastyrǵan oryndy», - deıdi Q. Qabyldın.
