Halyqtyq baqylaý ókilderi Almatydaǵy mektep qurylysyn tekserdi

ALMATY. QazAqparat – Panfılov atyndaǵy №54 Qazaq-Reseı mektep-gımnazııasynyń halyq baqylaýshylary «Jumyspen qamtýdyń jol kartasy» aıasynda ǵımaratty qalpyna keltirip, seısmıkalyq nyǵaıtýdy qolǵa alǵan merdiger kompanııa ókilderimen kezdesti, dep habarlaıdy QazAqparat tilshisi Nur Otan qalalyq fılıalynyń baspasóz qyzmetine silteme jasap.

«Bizdi búgin nysanǵa shaqyrǵan Almaly aýdandyq partııa fılıaly men fılıal janyndaǵy partııalyq baqylaý komıssııasyna alǵys aıtamyz. Ár otbasy qurylys jumystarynyń tezirek aıaqtalýyn taǵatsyzdana kútip otyr. Qazir bizdiń balalarymyz eki mektepke bólindi – bul № 128 jáne №134. Bul jaǵdaıda bizdi qashyqtyqtan oqytý qutqarady, biraq eger jańa oqý jylynda sabaqtar oflaın rejıminde ótetin bolsa, onda kóptegen adam balalardy mektepke aparyp, qaıtadan alyp ketýde qıyndyqtarǵa tap bolady»,-deıdi «Halyqtyq baqylaý» jobasyna qatysýshy ata-ana.

Merdiger uıymnyń ókili «Halyq baqylaýshylarynyń» dálelderimen kelisip, jumystardyń muqııat júrgizilip jatqanyn jáne osy mektepte sońǵy ret kúrdeli jóndeý 40 jyl buryn bolǵanyn atap ótti.

Sonymen qatar, ol ǵımarattyń úlken aýmaǵy jaramsyz bolyp qalǵanyn túsindirdi. Demek, jumys kólemi de artty.

Mysaly, búkil edendi aýystyrý qajet. Óıtkeni taqtaılar tolyǵymen shirip ketken.

«Jumysty bastaǵan kezde biz osyndaı 32 pýnktti qaıta jasaý kerek dep sheshtik. Mektep birneshe ret órtengen. Soǵysqa deıingi jyldary salynǵan. Baspaldaqtardy tekserý kezinde shirigen metall da tabyldy. Bastapqy jumys josparyn ózgertýge ruqsat alý úshin jeti aı ártúrli mekemelerge jáne tapsyrys berýshige júginýge ketti. Biz baspaldaqtardy tolyǵymen bólshektep, olardy aýystyrdyq, al bastapqy jobada tek keskindeme boldy»,- deıdi kompanııa ókili.

Onyń aıtýynsha, ǵımarattyń metall jaqtaýlary kúsheıtildi. Qabyrǵasyn sapaly tegisteý úshin qosymsha 35 mln teńge ınvestıtsııa tartyldy.

«Biz usaq-túıekke deıin bárin muqııat jasaımyz, óıtkeni jumys barysynda kemshilikter bir-birlep shyǵady. Men osy jyldyń shilde aıynda nysandy tapsyrýǵa ýáde beremin», - dedi merdiger.

Atalǵan nysanda ornalasqan partııalyq baqylaý beketiniń basshysy jáne qalalyq máslıhattyń depýtaty Ásııa Aqanovanyń aıtýynsha, múddeli tulǵalar arasyndaǵy osyndaı kezdesýler men syndarly dıalog Prezıdent Qasym-Jomart Toqaevtyń «Halyq únine qulaq asatyn memleket» tujyrymdamasyna tolyq sáıkes keledi.

Sonymen qatar, partııalyq jobalardy da, memlekettik baǵdarlamalardy iske asyrýdyń ashyqtyǵyn kórsetedi.