Halyqty jumyspen qamtýdy keńeıtýde qandaı qadamdar iske asyrylady

NUR-SULTAN. QazAqparat – Búgin Úkimet otyrysynda QR Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov halyqtyń tabysyn arttyrý jóninde túsinik berdi, dep habarlaıdy QazAqparat tilshisi.

Aqmádı Sarbasov sóziniń basynda halyqtyń naqty tabysy ekonomıkalyq ósý men eńbek ónimdiligine tikeleı baılanysty ekenin habarlady. Sońǵy on jylda JІÓ ósimi qyzmet kórsetý salasy esebinen 62%-ǵa qamtamasyz etildi, ondaǵy eńbek ónimdiligi óńdeý ónerkásibine qaraǵanda aıtarlyqtaı tómen.

«2015 jyldan beri qurylǵan jumys oryndarynyń 37 paıyzy eńbek ónimdiligi tómen salalarda quryldy (kóbinese memlekettiń qatysýy bar bilim berý, densaýlyq saqtaý, memlekettik basqarý salalarynda). Ónimdiligi joǵary salalarǵa jańa jumys oryndarynyń tek 8 paıyzy tıesili. Nátıjesinde, jumyspen qamtylǵan halyqtyń 41 paıyzy tabysy men ónimdiligi tómen salalarda jumys isteıdi. Osyǵan baılanysty, negizgi mindet – turaqty jáne ónimdi jumys oryndaryn qurý qarqynyn arttyrý», - dep toqtaldy birinshi vıtse-mınıstr.

Onyń paıymynsha, bul úshin jergilikti atqarýshy organdar ınvestıtsııalyq jobalardyń tizbesi men qurylatyn jumys oryndarynyń sanyn kórsete otyryp, óńirlik jumyspen qamtý kartalaryn bekitýi qajet. Al qurylatyn jumys oryndarynyń monıtorıngi salyq pen zeınetaqy jarnalarynyń túsimi jáne elektrondyq eńbek sharttaryn aqparattyq júıede baqylaý arqyly qamtamasyz etiledi.

«Halyqtyń tabysyn arttyrý jónindegi sharalar kesheni barlyq sanattardy qamtıtyn bolady. Azamattyq qyzmetshilerdiń (pedagogter, medıtsına qyzmetkerleri, áleýmettik qyzmetkerler, muraǵatshylar, kitaphanashylar, tehnıkalyq personal jáne t.b.) jalaqysyn ósirý jáne járdemaqylar mólsherin ınflıatsııa deńgeıine arttyrýdan basqa birqatar zańnamalyq bastamalar qabyldanady. Eńbek resýrstarynyń daǵdylaryn damytý úshin ekonomıkanyń qajettilikterine oraı kásiptik biliktilikti taný júıesi jáne qyzmetkerlerdiń daǵdylaryn sertıfıkattaý engiziledi», - dedi ol.

«Áleýmettik kodeksti qabyldaý azamattardyń muqtajdylyǵyna qaraı proaktıvti jáne qoljetimdi túrde áleýmettik qoldaý kórsetýdi qamtamasyz etedi. Ózin-ózi jumyspen qamtyǵan qyzmetkerler úshin eńbek qatynastaryn rásimdeýdiń jańa formalary men arnaıy salyq rejımderin engizý máselesi qarastyrylýda. Sonymen qatar, kásipkerlik bastamalardy qoldaý jáne jumyspen qamtý ınfraqurylymyn tsıfrlandyrý arqyly halyqty jumyspen qamtýdy keńeıtý boıynsha sharalar qabyldanady», - dedi Aqmádı Sarbasov.