Halyqty jumyspen qamtý salasynda aýtsorsıng uǵymy engiziledi
ASTANA. QazAqparat - Búgin Parlament Májilisiniń jalpy otyrysynda QR Eńbek jáne halyqty áleýmettik qorǵaý mınıstri Mádına Ábilqasymova «Elektrondy eńbek bırjasynyń» múmkindikterin túsindirdi, dep habarlaıdy QazAqparat.
Aıta keteıik, jalpy otyrys barysynda «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýy jáne kóshi-qony máseleleri boıynsha ózgerister men tolyqtyrýlar engizý týraly» zań jobasy talqylanyp, birinshi oqylymda maquldandy,
«Memleket basshysynyń tapsyrmasyn oryndaý úshin zań jobasynda jumyspen qamtý ortalyqtaryn reformalaý jáne barlyq bos jumys oryndary men barsha eldi mekender boıynsha biryńǵaı onlaın alań qurý kózdelgen. Osy maqsatta eńbek naryǵynyń biryńǵaı aqparattyq bazasyn quraıtyn «Elektrondy eńbek bırjasy» memlekettik ınternet resýrsyn qurý qarastyrylǵan. Bul jumys izdeýshiler men jumys berýshilerdi bir arnada toǵystyratyn alań. Sondaı-aq, halyqty jumyspen qamtý salasyndaǵy qyzmetterdiń aýtsorsıngi uǵymy engizilýde. Bul degenimiz, jumyspen qamtý ortalyqtarynyń halyqty jumyspen qamtý salasyndaǵy qyzmetterdi jumyspen qamtýdyń jekeshe agenttikterine berýine baǵyttalǵan sharalar kesheni», - dedi Mádına Ábilqasymova.
Zań jobasynda Eńbek mınıstrliginiń quzyretine kelesi qyzmetterdi júzege asyrý kiredi:
Memlekettik bıýdjet qarajaty esebinen halyqty jumyspen qamtý salasyndaǵy qyzmetterge arnalǵan tarıfterdi qalyptastyrý ádistemesin bekitý;
Halyqty jumyspen qamtý salasyndaǵy qyzmetterdiń aýtsorsıngi aıasynda usynylatyn qyzmetter tizbesin ázirlep jáne ony bekitý.
Aýtsorsıngke qatysatyn jeke jumyspen qamtý agenttikterine biliktilik talaptary ázirlenip, bekitiletin bolady. Aýtsorsıng mınıstrlik anyqtaǵan tártipte júrgiziledi.
«Jumys berýshilerdi artyq eseptilik pen qujat tapsyrýdan bosatý maqsatynda kásiptik jáne qaıta daıarlyqtan, óndiriste oqytýdan ótken adamdardyń sany týraly málimet berý mindeti alynyp tastalmaq. Sáıkesinshe, osy zań normasyn oryndamaǵany úshin jumys berýshilerdiń jaýaptylyǵy joıyldy», - dedi mınıstr.
