Halyqty jumyspen qamtý ortalyǵynyń basshysy para alǵany úshin sottaldy - Aqmola

KÓKShETAÝ. QazAqparat – Arshaly aýdany halyqty jumyspen qamtý ortalyǵynyń burynǵy basshysyna sot úkimi shyqty, dep habarlaıdy QazAqparat tilshisi Aqmola oblystyq sotyna silteme jasap.

Halyqty jumyspen qamtý ortalyǵynyń burynǵy basshysy «S» buıryqtardy zańsyz shyǵaryp, is-saparlarǵa arnalǵan qarajatty ózi ıemdengen. «S» talan-tarajǵa salýdy, ıaǵnı óziniń qyzmet babyn paıdalanýymen jymqyrýdy jasaǵan (QK-niń 189-baby 3-bóliginiń 2-tarmaǵy). Nátıjesinde memleketke 800 myń teńge somasyna iri mólsherde zalal keltirilgen (tolyq kólemde ótelgen). Al ekinshi qylmysta, «S» jumyssyz adamdardy qaıta daıarlaý jónindegi bilim qyzmetterine memlekettik satyp alý týraly sharttardy JShS-men jasasqan. Ol JShS-niń dırektory «B.»-dan qamqorlyq jáne aldaǵy ýaqytta jańa sharttardy jasasý úshin 560 myń teńge alǵan.

Osyǵan oraı, «S» para alǵany úshin sottaldy.

Sottalýshylar kinásin moıyndaǵandyqtan, qylmystyq is kelisimdik is júrgizýde qaraldy.

Sot úkimimen árqaısysyn memlekettik qyzmette laýazymdardy atqarý quqyǵynan ómir boıyna aıyrýmen «S.»-ǵa 16 770 000 teńge somasyna, «B.»-ǵa 11 180 000 teńge somasyna aıyppul taǵaıyndaldy.

Sot úkimi zańdy kúshine engen joq.