Halyqty jumyspen qamtý boıynsha Qazaqstannyń qaı óńirleri kósh basynda
ASTANA. QazAqparat - QR Eńbek jáne halyqty jumyspen qamtý vıtse-mınıstri Narıman Muqyshev halyqty jumyspen qamtý boıynsha kósh basyndaǵy jáne kósh sońyndaǵy óńirlerdi atady, dep habarlaıdy QazAqparat tilshisi.
«Búgingi tańda bizde respýblıka boıynsha qysqa merzimdi kásiptik oqýdy bitirgen 31 myń adamnyń 18 myńy jumysqa ornalasty. Bul rette eń joǵary kórsetkishke ıe óńirler - Aqmola, Qostanaı oblystary. Ol jaqta qysqa merzimdi kásiptik oqý bitirgenderdiń 85 paıyzy jumys tapqan. Sonymen birge, Almaty oblysynda osyndaı oqýdan ótkenderdiń 74 paıyzy, al Soltústik Qazaqstan oblysynda 71 paıyzy jumysqa ornalastyrylǵan», - deıdi Narıman Muqyshev.
Aıta ketsek, buǵan deıin Eńbek jáne halyqty áleýmettik qorǵaý mınıstri Mádına Ábilqasymova bul baǵytta Mańǵystaý oblysy (25 paıyz), Jambyl oblysy (39 paıyz), Almaty qalasy (27 paıyz) men Astana qalasynyń (41 paıyz) kórsetkishteri tómen ekenin habarlaǵan bolatyn.
Eske sala ketsek, búgingi Úkimet otyrysynda mınıstr nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy qalaı júzege asyrylyp jatqanyn baıandaǵan edi.
Onyń aıtýynsha, «Eńbek» memlekettik baǵdarlamasy eńbek naryǵynda suranysqa ıe mamandyqtar men daǵdylar boıynsha jappaı oqytýdy kózdeıdi. Mınıstr atap ótkendeı, tegin tehnıkalyq jáne kásiptik oqytý sheńberinde osy jylǵy 1 qyrkúıekten bastap 20 myń adam oqýǵa kirisken. Bul jyldyq jospardyń 99 paıyzyn quraıdy.
