Halyqty saqtandyrý júıesi qalaı ózgeredi

ASTANA. QazAqparat - Búgin Mınıstrler kabınetiniń kezekti otyrysynda saqtandyrý qyzmeti men saqtandyrý máseleleri jónindegi keıbir normatıvtik-quqyqtyq aktilerge ózgeristerdi engizý jaıy sóz boldy. QR Ulttyq bankiniń tóraǵasy Danııar Aqyshev zańnamanyń qalaı ózgeretinin túsindirip berdi, dep xabarlaıdy QazAqparat tilshisi.

«Birinshi ózgeris ol - onlaın saqtandyrý júıesin engizýge qajetti normatıvtik bazany ázirleý. Ókinishke qaraı, qazirgi zańnama atalǵan júıeni engizýge jol bermeı otyr. Al onyń atyqshylyqtary kóp. Jeke jáne zańdy tulǵalar saqtandyrý kompanııasynyń keńsesine sabylyp júrmeıdi. Endi bárin uıaly telefon, ıa bolmasa, kompıýter arqyly jasaýǵa bolady», - dedi Aqyshev Úkimet otyrysynan keıingi baspasóz máslıxatynda.

Onyń aıtýynsha, ekinshi ózgeris týrıstik qyzmetti saqtandyrýǵa qatysty. Oǵan sáıkes, shetelge shyǵatyn týrıstiń barlyq múlki saqtandyrýǵa jatady. Sapar kezinde naqty qaýip-qaterlerdiń tizimi de bolady.

«Qazirgi zańnama boıynsha týrıst qaıtip kelip, óz quqyǵyn sotta dáleldeýi tıis. Al qaýip-qaterlerdiń naqty tizimi bolsa, saqtandyrý tólemaqysyn shetelde júrip, ala berýge múmkindik bar», - dep atap kórsetti Bas bankır.

Budan bólek, saqtandyrý ýákiliniń qyzmeti keńeıe túsedi. Qazirgi kezde onyń ókilettiligi tek avtosaqtandyrýǵa jarymdy bolsa, aldaǵy ýaqytta saqtandyrýdyń barlyq túrlerine qoldanylatyn bolady.

Aıta keteıik, brıfıng kezinde Bas bankır teńge baǵamyna qatysty óz boljamyn da jarııalady. Onyń aıtýynsha, qazirgi kezde valıýta aıyrbastaý beketterine jappaı júgirip, odan tabys kórýdiń qajeti joq .